2026 сылга ипотека ыстаапката хайдах буолуоҕай?

Киин Баан сүрүн ыстаапката билиҥҥи түһүүтүн тэтимигэр оннунан хааллаҕына, ипотека сыллааҕы ыстаапката  12%-ҥа диэри тиийиэн сөп.

Маннык сабаҕалааһыны «Гарда Капитал» хампаанньа фондовай ырыынакка эспиэрэ Кирилл Селезнев эттэ.  «Бу сыл бүтүүтэ ипотека ыстаапката 15-16% , оттон кэлэр сылга 12%-ҥа диэри түһэрин көрүөхпүтүн сөп», — диэн Селезнев тылларын «Газета.ру» тиэрдэр суруйар.

Кини эбэн эппитинэн, маннык түһүү сыыйа-баайа буолуоҕа. Оттон салгыы ыстаапка намтыыра дойду макроэкэнэмиичэскэй балаһыанньатыттан тутулуктанар. Ыстаапка бу курдук сабаҕалааһынынан түстэҕинэ, нэһилиэнньэ үгүс өттүгэр син-биир туһанар кыаҕа суох буолара күүтүллэр.

Чопчулаан эттэххэ, бу сабаҕалааһыннар Киин Баан официальнай дааннайдарыгар олоҕураллар. Ол курдук, Киин Баан 2026 сылга сүрүн ыстаапканы 12-13%-ҥа диэри түһэриэ диэн сабаҕаланар.