2026 сылга МРОТу кытта тэҥҥэ ханнык социальнай төлөбүрдэр үрдүүллэрий?

Эһиил тохсунньу 1 күнүттэн хамнас алын кээмэйэ (МРОТ) ыйга 27 тыһ.солк. тахсыаҕа — 20,7%-нан улаатыннарар былааннанар. Маннык сокуон барылын Госдуума сэтинньи 18 күнүгэр иккис ааҕыыга ылынна. МРОТу кытта тэҥҥэ ханнык төлөбүрдэр үрдүүллэрин туһунан «Парламентская газета» кэпсээтэ.

МРОТ – үлэ биэрээччи  үлэһиттэригэр муҥутуур намыһах төлүүр хамнас суумата. Үлэ уратытынан эбии төлөбүрдэр эбэтэр оройуоннааҕы коэффициеннар ити суума үрдүнэн ааҕыллаллар. Ол эрээри, манна ыйы толору үлэлээбит хамнас туһунан этиллэр, онон киһи, холобур, аҥаар ставкаҕа үлэлиир буоллаҕына, киниэхэ хамнас алын кээмэйэ икки төгүл намыһах буолар, – диэн  Үлэ министиэристибэтин миниистирин солбуйааччы Дмитрий Платыгин быһаарда.

«МРОТ улаатыыта хамнаска эрэ буолбакка, социальнай төлөбүрдэр тиһигэр эмиэ дьайыаҕа, – диэтэ «Парламентскай хаһыакка» Госдуумаҕа Дьоҕус уонна орто урбаан кэмитиэтин чилиэнэ Алексей Говырин. –  Өскөтүн дьахтар официальнайдык дохуота суох буоллаҕына эбэтэр кини хамнаһа олохтоммут алын кээмэйиттэн намыһах буоллаҕына, босуобуйаны ааҕарга МРОТ туһаныллар», – диэн дьокутаат быһаарда.

Хамнас алын кээмэйин саҥа таһымыгар орто күннээҕи хамнас 891 солкуобай кэриҥэ буолуоҕа, онон итиннэ сөптөөх төлөбүрдэри ааҕан таһаарыыга төрүөт буолуоҕа, – диэтэ Говырин. Холобур,140 халандаарынай хонуктаах уоппускаҕа уонна оҕо төрөөһүнүгэр бэриллэр босуобуйа 124,7 тыһыынча солкуобай кэриҥэ буолуоҕа. Ыараханнык төрөөһүҥҥэ төлөбүр суумата 139 тыһыынча солкуобайга диэри улаатыаҕа, оттон элбэх оҕо төрөөтөҕүнэ босуобуйа кээмэйэ 172 тыһыынча солкуобайтан тахсыаҕа. Арассыыйаҕа МРОТу бастакы сылын улаатыннарбаттар. Ол курдук, 2021 сылга — 12 792 солк., 2022 с. – 13 890 солк., 2023 с. – 16 242 солк., 2024 с. – 19 242 солк., оттон 2025 с. – 22,4 тыһ. солк. этэ. «МРОТ үрдээһинэ үлэ төлөбүрүн бүтүн пуондатын соһон таһаарар», – диэн ааҕар Госдуумаҕа Үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин чилиэнэ Светлана Бессараб.