2026 сылга сулустар уларытыыны, бэлэҕи … түстүүллэр

2026 сыл зодиак бары бэлиэлэригэр уларытыыны, бэлэҕи бэлэмнээн турар. Сорохтору дьылҕаларын быһаарар көрсүһүү, үлэҕэ үрдээһин күүтэр, атыттары – айан, бэйэ сайдарыгар саҥа кыах. Туохха бэлэмнэнэбит?

Илиҥҥи халандаарынан үүнэр 2026 сыл – Уот кыһыл ат сыла. Бу иннинэ уһун кэм устата быһаарыллан испэтэх боппуруостарга ат сыла табыгастаах диэн этэллэр. Астрологтар этэллэринэн, бу сыл ордук үлэҕэ үрдээһиҥҥэ, тус сайдыыга, сыһыаҥҥа табыгастаах. Туох даҕаны идиэйэтэ да суох дьон ис кыахтара арыллан кэлиэн сөп. Олоҕу кытта тэҥҥэ сайдан, күннээҕи усулуобуйаҕа  түргэнник уларыйан-тэлэрийэн иһэр, эппиэтинэстэн куттаммат дьон ситиһиилэниэҕэ. Бу сыл сүрүн бириинсибэ – көхтөөх буолуу.

Хой

2026 сыл бастакы ыйдарыгар Хой бэлиэлээхтэр эр киһи (дьахтар) болҕомтотун тардыахтара. Бу тус дьолу, үлэҕэ ситиһиини даҕаны аҕалыаҕа. Ол эрээри, бу үлэҕэ атахтаабатын туһугар бэйэни кыана туттар ордук.

Сыл ортото дьиэ кэргэн, хамсаабат баай-дуол боппуруостарын быһаарарга табыгастаах. Сыл бүтүүтэ үгүстэри арамаантыка түгэнэ күүтэр. Соҕотох сылдьар дьон ыал буолуохтарын сөп. Уопсайынан, кыһалҕаны үөскэппит буоллаххына, быһаарыахтааххын. Онон эниэргийэҕитин сөпкө туһаныҥ диэн сүбэлииллэр.

Оҕус

Кэлэр сылга Оҕус бэлиэлээхтэри хамсааһын күүтэр: айан, көһүү эбэтэр сыл саҥатыгар тас дойду дьонун кытта үлэ инники күөҥҥэ тахсыаҕа. Ордук сыл ортотугар барыы-кэлии үп-харчы өттүгэр табыгастаах буолуоҕа.

Сыл бүтүүтэ атын дойдуга, куоракка көһөн хаалыаххытын сөп. Дьэ, ол барыта туоларын туһугар астрологтар былааҥҥытын эрдэттэн кэпсии сылдьымаҥ диэн сүбэлииллэр.

Игирэлэр

Мунньуллубут боппуруостаргытын сыл саҕаланыаҕыттан быһаарарга ылсыҥ. Бастакыта табылынна да барыта сатаныаҕа дии санаамаҥ, олус эрэнэн кэбиһэн сүрүн суолталаах боппуруоскутун кыайан быһаарбакка хаалыаххытын сөп. Үп-харчы балаһыанньата сыл ортотугар табыллыаҕа, ордук хамсаабат баай-дуол, доруобуйа харыстабылын, социальнай көмүскэл эйгэтигэр үлэлээччилэргэ.

Сыл бүтүүтэ үлэнэн да, сынньана даҕаны кэлии-барыы үксүөн сөп. Игирэлэр уопсастыбаҕа тахсалларыгар саамай сатабыллаах сыл.

Араак

Олус уйан араактар балаһыанньаны буортулаабат туһугар, сыл саҥата тус олоххутугар да, дьыалабыай көрсүһүүлэргэ даҕаны эмоцияҕытын төһө кыалларынан кыана туттуҥ, дипломатичнай буолуҥ. Сыл ортото үрдүк аптарытыаккыт араактарга сүрүн күүһүнэн буолуоҕа уонна дьыалаҕыт ситиһиилэнэригэр көмөлөһүөҕэ.

Сыл бүтүүтэ үбү-харчыны кытта сибээстээх хамсааһыны оҥорорго табыгастаах кэм. Ол кыалларын туһугар көхтөөххүтүн, талааҥҥытын көрдөрүөххүтүн наада. Уопсайынан, сыл устата өрө тахсыыгыт бэйэҕитин төһө кыана туттаргытыттан тутулуктаах диэн астрологтар туһаайан этэллэр.

Хахай

Хахайдар сыл саҕаланыытын үлэ боппуруоһун быһаарарга аныаххыт. Кыһаллыы түмүгэ түргэнник биллиэҕэ, ол эрээри, бэйэҕин олус үрдүктүк туттуу төттөрүтүн таҥнары тардыан сөп, онон сэрэхтээх буолуҥ. Сыл ортото “информационнай гигиенаны” тутуһуҥ уонна атын дьону кытта былааҥҥытын үллэстимэҥ. Төһөнөн аҕыйаҕы кэпсиэххит, соччонон элбэҕи ситиһиэххит.

Сыл бүтүүтэ аптарытыаккыт уонна киһи быһыытынан уратыгыт ситиһии кэлэригэр көмөлөһүөҕэ. Ол инниттэн сыл устата уолҕамчы быһыыгытын уҕарытыныҥ, үлэни бытаардар дии санаатаргыт да, эрдэттэн толкуйдаан баран хардыылааҥ.

Кыыс

Астролог этэринэн, Кыыс бэлиэлээхтэр сыл саҥата быраактыкаҕа, дьиҥнээх олоххо баар холобурдарга эрэ сигэнэллэрэ ордук. Бу күннээҕи олох-дьаһах боппуруостарыгар эрэ буолбакка, тапталлааххытын кытта сыһыаҥҥа эмиэ көмөлөһүөҕэ. Сыһыаҥҥыт төһөнөн кырдьыктаах да, соччонон тапталгыт күүһүрүөҕэ. Сыл ортото уопсастыба ортотугар сылдьа сатааҥ, саҥа, туһалаах дьону кытта билсиэххитин сөп.

Сыл бүтүүтэ Кыыс бэлиэлээхтэр аахсыйаларга, чугас дьоҥҥутугар көмөлөһөн кистэнэ сыппыт талааҥҥытын арыйыаххыт. Уустук боппуруостары суоттанан, ымпыгар-чымпыгар тиийэ толкуйдаан баран быһаарыҥ.

Ыйааһын

Ыйааһын бэлиэлээхтэргэ кэлэр сыл саҥата дьиэ кэргэн дьыалата, хамсаабат баайы-дуолу кытта сибээстээх боппуруос табыллыаҕа. Холобур, куорат таһыгар бэрт табыгастаахтык дьиэ атыылаһыаххытын сөп. Үлэҕитигэр сыл ортото ситиһиилэниэххит, үрдүөххүт, үүнүөххүт. Ордук Арассыыйа хампаанньаларыгар уонна судаарыстыбаннай сулууспаҕа үлэлээччилэр табыллыахтара.

Сыл бүтүүтүгэр социальнай эйгэҕэ биллиэххит-көстүөххүт. Көҥүл сылдьыы үчүгэй эрээри, эмоцияҕа бас бэринимэҥ, холобур, үлэҕититтэн уурайар буоллаххытына эрдэттэн былааннаан эрэ баран сайабылыанньаҕытын суруйуҥ. Дьону кытта сыһыаҥҥытын буортулаабат инниттэн, тулалыыр дьону кытта кэпсэтэргитигэр болҕомтолоох буолуҥ, бэйэҕитин кыана туттуҥ.

Скорпион

Астролог этэринэн, скорпионнар сыл саҥата элбэхтик кэлиэххит-барыаххыт, доҕотторгутун кытта көрсүөххүт. Сыл ортото бэйэҕит олорор сиргититтэн ыраах дьиэ дуу, кыбартыыра дуу атыылаһыаххытын, оннооҕор тас дойдуга кытта көһөн хаалыаххытын сөп.

Скорпионнар өскөтүн арыый хорсун соҕус, ситиһиилэрин аһаҕастык кэпсиир буоллахтарына, сыл бүтүүтэ үлэлэригэр үрдүүр кыахтаахтар. Үлэҕитигэр сыыһаны-халтыны оҥорбот, ыксаллаах быһаарыылары ылыммат туһугар, сыл устата болҕомтолоох буолуҥ уонна бииргэ үлэлиир дьоҥҥут угаайыларыгар киирэн биэримэҥ.

Охчут

Кэлэр сыл саҥатыгар охчут бэлиэлээхтэр барыһырар кэмнэрэ. Ситиһии кинилэр үлэҕэ кыһамньыларын уонна туруоруммут соруктарын, дьаныардарын үтүө наҕараадаларынан буолуоҕа. Сыл ортото уһун кэмнээх кириисистэн тахсар суолу тобулуоххут. Уһун кэмнээх инвестиция барыстаах буолуоҕа.

Охчут бэлиэлээх элбэх киһи сыл бүтүүтэ сынньана баралларыгар суоллара аһаҕас. Сыл устата күүстээх-уохтаах курдук сананыаххыт, бу эниэргийэни тапталлааххытыгар, оҕолоргутугар анааҥ. Охчут бэлиэлээх оҕолор кэлэр сылга сүрүн көҕүлээччи буолуохтара, хамсааһыҥҥа хардыыны оҥорорго көмөлүөһүөхтэрэ.

Чубуку

Чубуку бэлиэлээхтэргэ сыл саҥата үп-харчы өттүгэр табыгастаах кэм, ол эрээри, өһөс хааннарын киллэрбэтэхтэринэ, кыайыыларын үллэстэр буоллахтарына диэн “ноолоох”. Сыл ортото тус олоххутун оҥосторгутугар саамай ордук түһүмэх. Олохторун тухары кэтэспит сүрэхтэрин аҥаардарын булуохтарын, ыал буолуохтарын сөп.

Сыл бүтүүтэ уһун кэмнээх инвестиция боппуруоһун быһаарар ордук. Чугас дьоҥҥутун кытта алтыһаргытыгар тылгытын-өскүтүн көрүнэ сылдьыҥ.

Күрүлгэн

Күрүлгэннэр сыл саҥатыгар алҕас элбэх боппуруостарын быһаарар кыахтаах иһитиннэриини истиэхтэрэ. Сыл ортото бу бэлиэлээхтэргэ үптэрин-харчыларын туруга тупсуоҕа. Бу, үлэҕэ эбээһинэстэригэр эппиэтинэстээх буолууну кытта сибээстээх.

Астролог этэринэн, сыл бүтүүтэ табыгастаах, сатамньылаах дьону кытта билиһиннэриэҕэ. Ол гынан баран, сыл саҕаланыаҕыттан бүтүөр диэри айаҥҥа болҕомтолоох буолаллара ирдэнэр, ордук массыына ыытар кэмнэригэр.

Балыктар

Балыктар сыл саҥата көҥүл барбыт курдук сананыахтара. Үгүстэр былаан оҥостон олоххо киллэриэхтэрэ. Сыл ортото тууйа, тута сылдьыбыт санааларыттан босхолонон, эр киһини (дьахтары) кытта саҥа сыһыаны олохтуохтара.

Сыл бүтүүтэ болҕомтону үлэ соругун толорууга уурар ордук, ол табылыннаҕына кыһамньыгытын бэлиэтии көрүөхтэрэ, дуоһунаскытыгар үрдэтиэхтэрэ. 12 ый устата үпкүтүн-харчыгытын кичэллээхтик ааҕа, суоттуу сылдьыҥ, харчы боппуруоһун кытта сибээстээх чопчу биллибэт дьыалаларга ылсымаҥ.