2026 сылга үлэ тосту уларыйыа. Үлэһиттэр уонна үлэ көрдөөччүлэр туохха бэлэм буолуохтаахтарый?

Күн бүгүҥҥүттэн  үлэ күнүн кыраапыгын оҥоһуу өй (ИИ) былаанныан сөп. Үлэ эйгэтэ олус түргэнник уларыйан, хампаанньаларга каадырынан дьарыктанар исписэлиистэр 2026 сыл усулуобуйатыгар бэлэмнэнэллэр. Ол эрээри инникигэ туох уларыйыылар күүтэллэрий? Бу туһунан 360.ru саайт суруйар.

Офиска үлэ хаалыа, ол эрээри баҕа өттүнэн

09:00-тан 18:00-га диэри офиска булгуччу баар буолар кэм бүтүннүү ааһан эрэр. 2026 сылга гибриднай эрэһиим (кэмин аҥаара — дьиэҕэ, аҥаара — офиска) стандарт баар буолуоҕа. Үлэни көмпүүтэр иннигэр олорбут чааһынан буолбакка, чопчу үлэ түмүгүнэн сыаналыыр буолуохтара (KPI). Арассыыйа хампаанньаларын иннигэр маннык эрэһиими тэрийии эрэ буолбакка, киберкуттал суоҕун хааччыйыы уонна CRM-систиэмэлэр нөҥүө хамаандалары сатабыллаахтык, аһаҕастык салайыы курдук сүрүн соруктар тураллар. Ити атын эрэгийиэннэртэн үлэһиттэри үлэҕэ ыларга кыаҕы биэриэ.

Эһиги көмөлөһөөччүгүт — Оҥоһуу өй (ИИ)

Оҥоһуу өй ураты көстүү буолан бүтэн, калькулятор курдук мэлдьи туһаннылар тэрил буолуоҕа. Арассыыйаҕа сүрүннээн дойду оҥорон таһаарбыт оҥоһуктара буолуохтара. Оҥоһуу өй манныгы сатыыр буолара сабаҕаланар:

• Сүүһүнэн тахса резюметтан сөптөөҕүн түргэнник талыа;
• Чаакка хандьыдааттар ыйытыыларыгар хоруйдуо;
• Хас биирдии үлэһиккэ анаан тус үөрэх былаанын оҥоруо;
• Анонимнай ыйытыылар уонна корпоративнай чааттарга суруллубут биллэриилэри этика нуорматын тутуһан суруллубутун кэлэктиип иһигэр ырытыа.

Бу эйгэҕэ сүрүн кыһалҕанан  уустук систиэмэлэри кытта үлэлиир сатабыллаах исписэлиис аҕыйаҕа бэлиэтэнэр.

Тохтоло суох үөрэнии

Биир дуоһунаска үйэ саас тухары үлэлээһин — эргэрбит өйдөбүл. Хампаанньа инники сайдыыта тохтоло суох үөрэниигэ сытар. Аан дойду үлэ ырыынагар буолбут уларыйыылартан сылтаан, биисинэс бэйэтин үлэһиттэригэр олоҕуруо, кинилэри саҥа соруктарга көхтөөхтүк атын идэҕэ үөрэтиэ.

Көлүөнэлэр синергиялара

Устуоруйаҕа аан бастаан үлэ ырыынагар биир кэмҥэ бэс көлүөнэ тэҥник үлэлиэҕэ (беби-бумердартан саҕалаан Z көлүөнэҕэ диэри). Хас биирдии көлүөнэ ураты сыаннастарын уонна ыарыылаах өрүттэрин (улахан саастаахтарга — 90-с сыллар, эдэрдэргэ — сыыппаралааһын уонна саҥа кэм усулуобуйалара) учуоттаан, кинилэргэ сыһыаннан үлэҕэ уонна карьера сайдыытыгар уларыйа сылдьар сыһыаны туһаныы наада буолуоҕа. 2026 сылга ситиһиилээх хампаанньа — харчы төлүүр сир эрэ буолбатах. Манна бигэ туругу, суолтаны, этэҥҥэ буолууга кыһамньыны, тус сыһыаны уонна үүнэргэ-сайдарга кыахтары бэлэхтиир экосистиэмэ тэриллиэҕэ.