Декларацияны туттарар хампаанньа саҕаланна

Федеральнай нолуок сулууспатын (ФНС) Саха Сиринээҕи управлениета иһитиннэрэринэн, тохсунньу 1 күнүттэн  декларацияны туттарар хампаанньа саҕаланна.

2025 сылга нолуок төлөөччү, холобур, маннык түгэннэргэ дохуотун туһунан отчуоттуохтаах:

• бас билиигэ баар хамсаабат баайын-дуолун эбэтэр тырааныспарын атыылаабыт буоллаҕына;
• чугас аймахтарыттан буолбатах күндү бэлэхтэри ылбыт буоллаҕына;
• лотереяҕа сүүйбүт буоллаҕына (15 000 солк. диэри);
• баайын-дуолун куортамҥа биэрбит буоллаҕына;
• тас дойдулартан дохуот ылбыт буоллаҕына.

Ону таһынан декларацияны чааһынай урбаанньыттар, чааһынай нотариустар уонна албакааттар, итиэннэ атын сирэйдэр туттарыахтаахтар. 2025 сылга ылыллыбыт дохуоттар тустарынан 3-НДФЛ декларацияны 2026 сыл муус устар 30 күнүттэн хойутаабакка туттарыахха наада. Декларацияны туттарарга Арассыыйа ФНС «Физическэй сирэйдэргэ аналлаах нолуок төлөөччү тус кабинета» онлайн-сервиһэ ордук табыгастаах. Интерфейс алҕаһы оҥорортон көмүскүүр: тус дааннайдар, баай-дуол уонна үлэлиир сиринэн дохуот туһунан сибидиэнньэлэр бэйэлэрэ толоруллаллар. Декларацияҕа ааҕыллыбыт НДФЛ (физическэй сирэйдэр дохуоттарыттан нолуогу) 2026 сыл от ыйын 15 күнүгэр диэри төлүөххэ наада. 2025 сыллааҕы дохуоттары декларациялыырга Арассыыйа ФНС 20.10.2025 сыллааҕы № ЕД-7-11/913@ бирикээһинэн бигэргэтиллибит 3-НДФЛ нолуок декларациятын саҥа формата туттуллуоҕа. Декларацияны туттарыы болдьоҕо (муус устар 30 күнэ) нолуок вычеттарын ыларга аналлаах декларацияларга тарҕаммат. Кинилэри сыл устата ханнык баҕарар кэмҥэ туттарыахха сөп диэн ФНС Саха сиринээҕи управлениетын пресс-сулууспата суруйар.