2026 сылтан оҕолоох ыалларга судаарыстыба өйөбүлүн саҥа көрүҥэ үлэлиэҕэ

2026 сыл саҕаланыаҕыттан Арассыыйаҕа дьиэ кэргэҥҥэ аналлаах нолуоктан төлөбүр баар буолуоҕа. Бу туһунан сенатор Игорь Мурог иһитиннэрдэ.

«Төлөбүрү 18-гар диэри саастаах оҕолордоох ыаллар, ону таһынан 23-гэр диэри саастаах күнүскү үөрэххэ үөрэнэр эдэр дьон ылыахтара», — диэн Мурог тылларын RT суруйар.

Төлөбүр кээмэйэ ыалга төһө сокуоннай сааһын ситэ илик оҕо баарыттан уонна ыал уопсай дохуотун таһымыттан тутулуктанан уларыйыаҕа диэн бэлиэтэнэр. Элбэх оҕолоох уонна аҕыйах дохуоттаах дьоҥҥо ураты болҕомто ууруллуоҕа. Төлөбүрү оҥорторорго дохуот таһымын уонна оҕо баарын бигэргэтиэххэ наада, диэн сенатор чуолкайдаата.

Сайабылыанньаны «Госуслуги» портаал нөҥүө эбэтэр нолуок иниспиэксийэтигэр  биэриэххэ сөп. Кини этэринэн, бу дьаһал дьиэ кэргэн институтун бөҕөргөтүүгэ, оҕо төрөөһүнүн үрдэтиигэ уонна уопсастыбаҕа бигэ туругу өйөөһүҥҥэ туһуланар. Судаарыстыба өйөбүлүн саҥа көрүҥэ дойду билиҥҥи бэлиитикэтин сүрүн хайысхаларыгар толору эппиэттиир.

Үлэҕэ уонна социальнай харысхалга миниистирэ Антон Котяков иһитиннэрбитинэн, дьаһал иккиттэн элбэх оҕолоох сэттэ мөлүйүөнтэн тахса үлэлиир төрөппүккэ ананар, төлөбүр кээмэйэ физическэй сирэйдэр дохуоттарыттан төлөөбүт нолуоктарын сэттэ бырыһыаныгар тэҥнэһиэҕэ. Бу тэҥинэн, судаарыстыба олох ыарахан түгэнигэр түбэспит ыаллары өйүүр «социальнай хантараак» бырагырааматыгар 46 миллиард солкуобайы кэриҥэ сууманы көрөрү былаанныыр.