2027 сылга “АлСиб” тэриллибитэ 85 сыла туолар

 1942-1945 сс. “Аляска-Сибиир” кистэлэҥ авиатрассанан Эмиэрикэттэн 8000 сөмөлүөт кэлбитэ.

Аан дойду дьалкыйа турар кэмигэр норуоттары сомоҕолуур, дьону түмэр тэрээһин Хотугу пуорум чэрчитинэн “АлСиб” былааҕын аннынан бара турар. Туох үлэ бара турарын туһунан “Хотугу пуорум” секретариатын толорооччу дириэктэрэ Владимир Васильев кэпсээтэ:

“2021 сыллаахха эмиэрикэтээҕи кэллиэгэлэрбитин кытта “АлСиб” норуоттар икки ардыларынааҕы ассоциациятын тэрийэр туһунан былааннаабыппыт. Быйыл Аляскаҕа бэрэсидьиэммит Владимир Путин Дональд Трампы көрсүһүүтүн кэнниттэн, ити былааммыт оннуттан хамсаарай диэн эрэл санаа уһугунна. Онон Хотугу пуорум чэрчитинэн Чукоткаттан, Магадантан, Саха сириттэн, Иркутскай уобаластан, Красноярскай кыраайтан, о.д.а. барыта 100-чэкэ киһи АлСиб былааҕын аннынан түмүстүбүт. Ол курдук, Иркутскай уобалас “Хотугу Байкал” хампаанньа бөлөҕүн дьоно «Байкал-Аляска: по следам АлСиба» авиационнай эспэдииссийэ тэрийэн, эһиил дьоҕус гидро-сөмөлүөттэринэн Иркутскайтан Аляскаҕа диэри көтөр былааннаахтар. Ону кытта от ыйын бүтүүтэ Эмиэрикэ өттүттэн авиация бэтэрээннэрэ иккис аан дойду сэриитин саҕанааҕы сөмөлүөттэринэн Аляскаттан Красноярскайга диэри көтөн кэлиэхтэрин баҕараллар. Бу хамсааһыҥҥа атын хайысхаларынан, холобур култуурунай бырагырааманан кыттыһыахтарын баҕарар дьон элбэхтэр. АлСиб былааҕын аннынан марафон сүүрүөхтэрин баҕарар дьон да бааллар. Ол гынан баран, бу барыта аныгы геобэлитиичэскэй балаһыанньаттан тутулуктааҕын бары өйдүүбүт. Дойду иһигэр  саамай үрдүк таһымҥа өйөбүлү ыллыбыт, АХШ посольствотын өттүттэн эмиэ утарсыы суох.

Бу ыйтан саҕалаан АлСиб-ка сыһыаннаах элбэх тэрээһин саҕаланна. Сэтинньи 6 күнүгэр Иркутскайга пресс-кэмпириэнсийэ ыыттылар, 1942 сыл сэтинньи 11 күнүгэр АлСиб бастакы сөмөлүөтэ Красноярскайга түспүтүнэн онно эмиэ тэрээһиннэр саҕаланнылар, оттон манна Дьокуускайга  сэтинньи 25-26 күннэригэр ыытыахпыт, ол кэннэ 27 чыыһылаҕа араас куораттартан сылдьар көҕүлээччилэри кытта быһаччы былааны оҥостуохпут. Оттон сэтинньи 30 – ахсынньы 2 күннэригэр авиация, погрансулууспа, о.д.а араас эйгэ исписэлиистэрэ кыттыылаах улахан кэмпириэнсийэ буолуоҕа. Ахсынньы 24 күнүн диэки Камчаткаҕа түмүктүүр тэрээһин  ыытыллыаҕа. Бу үлэ барыта туһалаах буолуо дии саныыбыт, тоҕо диэтэххэ, 2027 сыллаахха “АлСиб” тэриллибитэ  85 сыла туолар”.