2027 сылтан үрдүк үөрэх кыһаларыгар күүстээх реформаны бэлэмнииллэр

РФ Үөрэҕириитин уонна билимин министиэристибэтигэр иһитиннэрбиттэринэн, үрдүк үөрэх саҥардыллыбыт тиһигин киэҥник киллэрии 2027–2028 үөрэх дьылыгар саҕаланыаҕа.

«2026-2027 үөрэх дьыла – бастыҥ үрдүк үөрэх кыһалара уларыыйыыны киллэрэн саҕалыахтара; 2027-2028 үөрэх дьыла – дойду үрдүнэн уларыйыылары киэҥник киллэрии саҕаланыаҕа», – диэн ТАСС иһитиннэрэр.

Маны биэдэмистибэ бэрэстэбиитэллэрэ, ол иһигэр миниистири солбуйааччы Дмитрий Афанасьев, бигэргэттилэр. Бу иннинэ Дмитрий Афанасьев  урут саҥа тиһиги тургутар пилотнай бырайыакка кыттар үрдүк үөрэх кыһаларын ахсаанын кэҥэтэр былааннар тустарынан иһитиннэрбитэ.

Саҥа уларыйыы «бакалавриат–магистратура» тиһигиттэн аккаастаныыны көрдөрөр. Ол оннугар икки таһым үөскүөҕэ: сүрүн (базовай) уонна идэтийбит (специализированнай) үөрэх.

Сүрүн таһым – бу идэҕэ бэлэмниир толору бырагыраама буолуоҕа, бэлэмнэнии хайысхатыттан тутулуктанан 4-тэн 6 сылга диэри болдьохтоох. Бакалавриаты уонна  магистратураны солбуйуохтаах.

Идэтийбит таһым тус идэҕэ бэлэмнээһини хабыаҕа – манна магистратура, ординатура уонна ассистентура-стажировка киириэхтэрэ. Бу түһүмэххэ үөрэх болдьоҕо 1-тэн 3 сылга диэри буолар.

Эбиитин иһитиннэрэллэринэн, аспирантура профессиональнай үөрэх туспа көрүҥэр араарыллыаҕа. Бу, реформаны оҥорооччулар санааларынан,  билим сыаннаһын уонна практическай туһаайыытын үрдэтиэхтээх. Урут Үөрэххэ уонна билимҥэ министиэристибэтигэр устудьуоннары урбааҥҥа эмиэ үөрэтэр суолталааҕын быһаарбыттара.