2028 сылга диэри биэнсийэ 30 тыһ.солк. диэри улаатыа

Үс сылынан Арассыыйаҕа страховой биэнсийэ орто кээмэйэ индексация ыытылларын түмүгэр 25%-нан улаатан, кээмэйэ 30 тыһыынча солкуобайга диэри тиийиэҕэ. Бу туһунан РФ Социальнай пуондатын бүддьүөтүн барылыгар Ааҕар-суоттуур балаата оҥорбут түмүгэр этиллэр.

Ол да буоллар, биэнсийэ маннык үрдээһинин кэннэ, орто хамнастааҕар түөрт төгүл намыһах хаалыаҕа. Орто хамнас, сабаҕалааһынынан, эмиэ чиэппэринэн улаатан, 125 тыһыынча солкуобай буолуоҕа. Ол түмүгэр, биэнсийэ кээмэйин уонна орто хамнас сыһыана 23%-ҥа диэри намтыаҕа.

Бу Үлэ аан дойдутааҕы тэрилтэтэ сүбэлиир 40%-наах муҥутуур кыра көрдөрүүтүнээҕэр быдан намыһах. 2025 сылга страховой биэнсийэ орто сыллааҕы кээмэйэ 23,4 тыһыынча солкуобайга тэҥнэстэ. Үлэлээбэт биэнсийэлээхтэр үгүстэригэр бу суумма 24,7 тыһыынча солкуобай буолуоҕа. Инникитин төлөбүрдэр сыыйа-баайа үрдээн иһиэхтэрэ.

2026 сылга 7,6% индексация былааннанар, оттон 2027 уонна 2028 сылларга иккилии түһүмэҕинэн үрдэтии көрүллэр: олунньуга 4%-нан уонна муус устарга 3,4-3,8%-нан. Онон, 2028 сылга диэри, быһа сабаҕалааһынынан, биэнсийэ орто кээмэйэ 29,4 тыһыынча солкуобай буолуо, оттон үлэлээбэт биэнсийэлээхтэргэ бу суума 30,7 тыһыынча солкуобайга тиийиэҕэ.  Ол курдук, билиҥҥи көрдөрүүлэри кытта тэҥнээтэххэ, биэнсийэ төлөбүрэ 25% кэриҥэнэн улаатыа.

Маннык дааннайдар РФ Социальнай пуондатын бүддьүөтүн барылыгар Ааҕар-суоттуур балаата бэлэмнээбит отчуотугар киирдилэр. Докумуон ис хоһоонун «Известия» таһаарда.