204-с түөлбэҕэ «Намыв» ыстаансыйа тутуллан бүтэн эрэр

Дьокуускайга 204-с түөлбэҕэ «Намыв» ыстаансыйаны тутуу бүтэн эрэр. Бу туһунан Быһа эпиир кэмигэр Ил Дархан Айсен Николаев иһитиннэрдэ.

«Биһиги 204-с түөлбэҕэ «Намыв» ыстаансыйатыгар аныгылыы моһуоннаах, дьон кэтэһэр пуунун тутууну түмүктүү сылдьабыт. Ол аата бу биисинэскэ аныгы, сөптөөх логистика олохтонон эрэр, ол эмиэ биһиги усулуобуйабытыгар сүрдээҕин ирдэнэр», — диэтэ Айсен Николаев.

Ону тэҥэ өрүс суолун ырыынагар үчүгэй уларыйыылары бэлиэтээтэ. Саҥа таһаҕас тиэйээччи, «Сулус» тэрилтэ үөскээһинэ үгэс буолбут таһаҕас тиэйээччилэргэ улахан күрэстэһиини үөскэттэ.

«Быйыл «Сулус» тэрилтэ аһыллыбыта, манна өр сылларга үлэлээбит таһаҕас тиэйээччилэргэ олус улахан күрэстэһиини үөскэттэ. Мин куруук этэбин: күрэстэһии хаһан баҕарар үчүгэй. Ол сыананы түһэриигэ тиэртэ. Биллэн турар, сөбүлээбэт дьон элбэхтэр, ордук урут уу аалыгар дьону таһыыга үлэлээбит дьон ортолоругар. Ол эрээри, нэһилиэнньэ мантан туһаны ылла. Сыаналар чэпчээтилэр, чэпчээбит буоллахтарына, ону өйүөхтээхпит. Бу чахчы сөптөөх ырыынак күрэстэһиитэ. Онон, хампаанньа сөптөөх ньыманы тутуһар дии саныыбын», — диэн бэлиэтээтэ.

Айсен Николаев эппитинэн, хампаанньа салгын тирэхтээх суудуналары ырыынакка таһаардаҕына, маннык өҥөлөр өссө табыгастаах буолуохтара.

Сиһилии: https://www.sakha.gov.ru/news/12643