21 оҕоҕо үөрүүлээх быһыыга-майгыга пааспары туттардылар

Национальнай бибилэтиэкэҕэ 14 сааһын туолбут 21 оҕоҕо пааспары үөрүүлээх быһыыга-майгыга туттардылар. Тэрээһин Судаарыстыбаннас күнүн көрсө уонна «Мои Документы» киин 15 сыллаах үбүлүөйүнэн ыытылынна. 

— Урут биһиги кииммитигэр 14 сааһын туолбут оҕолорго пааспары биэрэргэ сайабылыанньаны эрэ ылар этибит. Оттон пааспары ИДьМ миграция боппуруостарынан управлениетыттан баран ылар этилэр, — диэн «Мои Документы» киин салайааччыта  Максим Ефремов кэпсээтэ.

Муус устар 30 күнүгэр диэри 50 оҕоҕо пааспардары үөрүүлээх быһыыга-майгыга туттарыы Уус Алдан, Өлүөхүмэ, Томпо, Ленскэй, Бүлүү улуустарыгар ыытыллаллара былааннанар. Бу маннык үгэс үөскээбитэ үс сыл буолла, барыта 1000-тан тахса оҕо пааспарын туппута.

Пааспары ылыы — оҕолорго да, төрөппүттэргэ да үөрүүлээх түгэн, оҕо улааппытын, улахан киһи курдук бырааптаммытын туоһулуур бэлиэ кэрчик кэм.

Аныгыскы туттарыы Кыайыы күнүн иннинэ —  ыам ыйын 7 күнгэр буолуоҕа. Тэрийээччилэр этэллэринэн, бырайыак кыттааччылара пааспары эрэ буолбакка, «Мои документы» киинтэн бэлэхтэри: паапканы, блокноту, уруучуканы, Анал суругу, РФ Конституциятын туталлар. Бу маллар бары бэлиэ суруктаахтар.