21 сыл анараа өттүгэр икки киһини өлөрүүгэ холуобунай дьыала силиэстийэтэ түмүктэннэ

Ньурбатааҕы силиэстийэлиир отделениета 40 саастаах эр киһи икки киһини өлөрүүгэ буруйдааһыныгар холуобунай дьыалатын силиэстийэлээһинин түмүктээтэ.

Силиэстийиэ быһаарыытынан, 2003 сыл балаҕан ыйыгар Ньурбаҕа Советскай уулуссаҕа турар олорор дьиэ таһыгар буруйдаах итирик туруктаах сылдьан, билбэт эр киһи уонна дьахтар икки ардыларыгар иирсээннэрин көрөн тиийбит. Уулусаҕа сытар хардаҕаһы ылан, эр киһини хаста да төгүл төбөтүгэр охсубут. Эмсэҕэлээччи куота сатаабыт да, буруйдаах ситэн тиийэн хардаҕаһынан сынньарын салҕаабыт. Ылбыт эчэйиилэриттэн эмсэҕэлээччи миэстэтигэр өлбүт.

Онтон дьахтар туоһу буолбутун санаан кэлэн, эмиэ төбөтүгэр хардаҕаһынан охсубут, ол кэннэ өйүн сүтэрбит дьахтары дьиэҕэ соһон киллэрбит. Эмсэҕэлээбит дьахтар ылбыт эчэйиилэриттэн өлбүт.
Өлбүт дьону сарсыныгар сарсыарда ыаллыы олорор эр киһи булбут уонна быраабы араҥаччылыыр уорганнарга тыллаабыт.

Өр сыллар устата буруйу оҥоруу дьыалата арыллыбытах эрээри, силиэстийэлээччилэр, криминалистар үлэлэринэн, ИДьМ үлэһиттэринэн холуобунай дьыала матырыйаалларын чинчийэн буруйдаах киһи лиичинэһэ быһаарыллыбыт. Ол түмүгэр дакаастыыр баазаны бөҕөргөтүүгэ бары силиэстийэлиир үлэлэр ыытылыннылар. Борокуруорунан дьыала суут көрүүтүгэр ыытылынна, диэн СӨ Силиэстийэлиир кэмитиэтин пресс-сулууспата суруйар.