Дьокуускайга оҕолорго Кыайыы параада буолла

Ыам ыйын 28 күнүгэр Кыайыы пааркатыгар оскуола иннинээҕи тэрилтэлэрин иитиллээччилэрин ортолоругар оҕо параада буолан ааста.

«Живет Победа в поколениях» диэн девизтээх хаамыыга 656 оҕо кытынна. Былаһааккаҕа тематическай композициялар, аныгы байыаннай тиэхиньикэ макеттара туруорулуннулар, ону тэҥэ «Броня крепка, и танки наши быстры» макеттар куораттааҕы куонкуруһун кыайыылаахтарын наҕараадалааһына ыытылынна. Бу туһунан СИА иһитиннэрэр.

Эдэр кыттааччылар байыаннай таҥастары кэтэн хаамтылар — пехота, спецназ, о.д.а. Параадка Дьокуускай куорат бэтэрээннэрин Сэбиэтин бэрэссэдээтэлэ Николай Тряпша кыттыыны ылла. Параад хамандыырынан «Туллукчаан» 10 №-дээх оҕо уһуйаанын иитиллээччитэ Петр Федоров буолла.

Куонкурус түмүгүнэн кыайыылаахтар быһаарылыннылар. Гран-прины «Цветик-семицветик» 23 №- дээх оҕо уһуйаанын Ян Николаев төрөппүтэ ылла. Бастакы миэстэни Сергей Сташков уонна кини уола, 13 №-дээх «Светлячок» оҕо уһуйаанын иитиллээччитэ Никита ыллылар. Иккис миэстэҕэ Руслан Федоров уонна кини сиэнэ, 91 №- дээх «Росток» оҕо уһуйааныттан Айталина буоллулар. Үһүс миэстэни «Журавлик» 14 №-дээх оҕо уһуйаанын кэлэктиибэ ылла.