22 мөлүйүөнү уорбут УК үлэһиттэрин дьыалалара суукка ыытылынна

Ис дьыала министиэристибэтин СӨ Силиэстийэлиир управлениетын тэриллиилээх буруйу оҥоруу дьайыыларын силиэстийэлиир биригээдэтэ 22 мөлүйүөнтэн тахса солкуобайы уорууга буруйданар үс дьахтары утары холуобунай дьыаланы силиэстийэлээһини түмүктээтэ.

Силиэстийэлиир үлэһиттэр этэллэринэн,  «Бюджетник» салайар хампаанньа (УК) урукку салайааччыта тэҥ ааттаах тэрилтэлэри тэрийбитэ, ол кэнниттэн кинилэр ааттарыттан Дьокуускайга  хомунаалынай өҥөлөрү оҥорууга олох-дьаһах, хааччыйыы хампаанньаларын кытта дуогабар түһэрсибитэ. Буруйданар киһи кылаабынай бухгалтерын уонна билэр киһитин саҥа тэрийбит аһаҕас хампаанньа дириэктэринэн анаан баран, сокуоннайа суох дьыалаҕа кытыннарбыт.

Киксээччилэр элбэх кыбартыыралаах дьиэ хаһаайыттарыттан  хомунаалынай өҥөлөргө хомуйбут харчыларын  хааччыйар тэрилтэлэргэ ыыппатахтар, тус наадаларыгар бэйэлэрин баҕаларынан ороскуоттаабыттар.

Ол курдук, 2015 сыл бэс ыйыттан 2019 сыл ахсынньытыгар диэри болдьоххо сууттанааччылар «Якутскэнерго» ПАУо, «Водоканал» АУо уонна «Теплоэнергия» АУо өҥөлөрүн иһин төлөөһүҥҥэ анаммыт 22 мөлүйүөнтэн тахса солкуобайы бэйэлэригэр ылбыттар.

РФ Холуобунай кодексатын 160 ыстатыйатын 4 чааһыгар олоҕуран тэриллибит холуобунай дьыаланы силиэстийэлээһин түмүктэннэ.   Буруйданааччыларга буруйдуур түмүк куоппуйата тиксэриллибитин кэннэ, Дьокуускай куорат суутугар ыытыллыаҕа.

Үһүс сууттанааччыга тэриллибит холуобунай дьыала суут иннинээҕи дуогабар түһэрсиллибитинэн сибээстээн, туспа дьыаланан бэрэбиэркэлэммитэ уонна суукка көрүллэ сылдьар.

ИДьМ пресс-сулууспата.