Сунтаар улууһун Үрүҥ Тунах Ыһыаҕа саҕаланна

Уус-уран тыл, саха норуотун үҥкүүтүн култууратын маастара, норуот ырыаһыта, оһуохайы таһаарааччы, олоҥхоһут Сергей Зверев-Кыыл Уола төрөөбүтэ 125 сылыгар аналлаах Сунтаар улууһун Үрүҥ Тунах Ыһыаҕа саҕаланна.

Бэҕэһээҥи курулас ардах кэнниттэн, күммүт күөрэччи тыкта. Ыһыах Кыыл Уолун аймах-дьонун, оҕолорун сүрүн түһүлгэҕэ ыҥырыынан саҕаланна.

Ньурба, Үөһээ Бүлүү, Мииринэй, Ленскэй, Нам, Мэҥэ-Хаҥалас, Уус Алдан улуустарыттан ыалдьыттар дэлэгээссийэлэрин Сунтаар дьоно-сэргэтэ уруйдуу-айхаллыы көрүстүлэр.

Улуус сайдыытыгар араас сылларга үлэлээбит СӨ Бырабыыталыстыбатын Бэрэссэдээтэлин солбуйааччы Сергей Местников, Ил Түмэн бэрэссэдээтэлэ Алексей Еремеев, Ө култуураҕа уонна духуобунай сайдыыга миниистирэ Афанасий Ноев,  баһылыктар, тэрилтэ салайааччылара, өрөспүүбүлүкэ миниистирдэрэ, суруйааччылар, Галина Бочкарева салайааччылаах суруналыыстар бөлөхтөрө күндү ыалдьыт буоллулар. Ыһыах Людмила Пустолякова алгыс ырыатынан саҕаланна.

26 нэһилиэк баһылыктара саха маанылаах аттарыгар олорсон киириилэрэ улахан түһүлгэ дьоһуннаах көстүүтүнэн буолла. Ыһыах Дуоҕа бухатыырын улуус аҕа баһылыга Анатолий Григорьев көтөхтө. Ыһыаҕы арыйар төлкөлөөх түөрэҕи биллэрдэ.