Саха сириттэн 2263 буойун испииһэгин Кыайыы түмэлигэр туттардылар

РФ Бэрэсидьиэнин иһинэн СӨ  бастайааннай бэрэстэбиитэлэ — СӨ Бырабыыталыстыбатын Бэрэссэдээтэлин бастакы солбуйааччы Андрей Федотов Саха сириттэн 2263 буойун ааттарын испииһэгин Кыайыы түмэлин генеральнай дириэктэригэр Александр Школьниковка туттарда.

Бу буойуттар ааттара Бүтүн Арассыыйатааҕы историческай-социальнай «Лица Победы» диэн бырайыакка киллэриллиэхтэрэ. Бырайыак чэрчитинэн Саха сирин олохтоохторо биир дойулаахтарын ааттарын «норуот экспозициятыгар» Арассыыйа киин куоратын сүрүн мемориальнай киинигэр булуохтарын сөп, диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.

«Биир бырайыакпыт «Лица Победы» диэн ааттанар. Мин Ил Дархан сорудаҕын толорон, Кыайыытүмэлин бырайыагар 2263 байыастар ааттарын испииһэгин туттардым, — диэн Андрей Федотов бэлиэтээтэ.

Ону сэргэ «Лица Победы» бырайыагы «Бастионы памяти» бырайыак идеологиятынан олус чугастар диэн кини эбэн эттэ.

«Аҕа дойду Улуу сэриитин сылларыгар биһиги биир дойдулаахтарбыт 19 эрэгийиэнинэн сэриилэспиттэрэ уонна олохторун толук уурбуттара. Онон бу эрэгийиэннэринэн мемориаллары туорарарга санаа үөскээбитэ. Кэлин биир дойдулаахтарбыт бу испииһэктэргэ бэйэлэрин аймахтарын булан көрүөхтэрин сөп уонна кинилэри ытыктыыр кыахтаныахтара», — диэтэ Андрей Федотов.

Санатан эттэххэ, Улуу Кыайыы 80 сылыгар аналлаах норуоттар икки ардыларынааҕы историческай-патриотическай «Бастионы памяти» бырайыак чэрчитинэн мемориальнай комплекстар Калужскай, Смоленскай, Псковскай уобаластарга туруоруллуохтара.