«Эдэр дьоруойдар кэмнэрэ» симиэнэҕэ Арассыыйа 15 эрэгийиэниттэн 300 оҕо муһунна

«БУОЙУН» киин «Океан» Бүтүн Арассыыйатааҕы оҕо киинин кытта Приморскай кыраай Владивосток куоратыгар «Эдэр дьоруойдар кэмнэрэ» бастакы сайыҥҥы байыаннай-патриотическай симиэнэтин саҕалаата.

240 оҕо атырдьах ыйын 30 күнүттэн балаҕан ыйын 19 күнүгэр диэри ыытыллар иккис симиэнэҕэ кыттыаҕа. Симиэнэ иккис сылын субуруччу тэрилиннэ.

2024 сылга 13-тэн 17-гэр диэри саастаах, уопсайа 80-ча киһилээх икки бөлөх оҕо бэлэмнэниитин ааспыта. «БУОЙУН» киин Бурятия, Саха Өрөспүүбүлүкэлэригэр, Хабаровскай кыраайга, Сахалинскай уонна Свердловскай уобаластарга курсааннарын таһынан, профильнай симиэнэҕэ Крым Өрөспүүбүлүкэтиттэн, Алтай, Забайкальскай уонна Приморскай кыраайдартан, Амур, Владимирскай, Новосибирскай, Томскай уонна Еврейскэй аптаныамыйалаах уобаластарыттан, Москва куораттан кэлбит оҕолор кыттыахтара.

«„БУОЙУН“ киин РФ Бэрэсидьиэнин Владимир Владимирович Путин сорудаҕынан, ыччаппытын, ол аата, дойдубутун күүстээх оҥорор сыалтан тэриллибитэ. Дойдутун патриота ханнык баҕарар гражданин буолуохтаах — бу олус улахан суолталаах. Биһиги киин үлэтин өссө да сайыннарыахпыт», – диэн  РФ Бырабыыталыстыбатын Бэрэссэдээтэлин солбуйааччыта – Арассыыйа Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ, «БУОЙУН» киин Кэтиир сэбиэтин Бэрэссэдээтэлэ Юрий Трутнев эттэ.

От ыйын 15 күнүгэр диэри оскуола оҕолоро «БУОЙУН» киин Хабаровскайдааҕы филиалын уонна Арассыыйа бойобуой снайпингын Федерациятын 11 инструктора кыттыытынан инженернэй, тактическай уонна ытыы бэлэмнэниитин ааһыахтара, Арассыыйа национальнай куттала суох буолуутун төрүттэрин, сибээс тэриллиитин, тактическай мэдиссиинэни үөрэтиэхтэрэ, дрону салайарга үөрэниэхтэрэ, байыаннай-күрэстэһии оонньуулары оонньуохтара.