23 саастаах кыыс эр киһини албыннаабыт

ИДьМ Дьокуускай куораттааҕы 4-с №-дээх полиция салаатын дьуһуурунай чааһыгар  38 саастаах эр киһиттэн үҥсүү киирбит. Ол курдук кини аатыгар кирэдьиит оҥоһуллубут уонна харчыта уоруллубут.

Холуобунай ирдэбил үлэһиттэрэ Эдьигээн оройуонуттан төрүттээх 23 саастаах уорбаланааччы кыыһы туппуттар. Онно биллибитинэн, эмсэҕэлээччи саҥа билсибит кыргыттарын кытта арыгылаабыт. Эр киһи утуйбутун туһанан, уорбаланааччы кыыс кини төлөпүөнүн ылан онлайн-баан нөҥүө 404 тыһ. солкуобайдаах кирэдьиит оҥотторбут.

Арассыыйа Федерациятын холуобунай кодексатын 158 ыст. «Уоруу» диэнинэн холуобунай дьыала тэриллибит. Бу ыстатыйа сааҥсыйатынан киһи көҥүлэ алта сылга диэри быһыллыан сөбүн туһунан ИДьМ пресс-сулууспата иһитиннэрэр.