Саха сирин сүүмэрдэммит хамаандата «Путь воина» күрэххэ бэлэмнэнэр

Саха сирин хамаандата «Путь воина» Бүтүн Арассыыйатааҕы күрэххэ бэлэмнэниитин саҕалаата. Бу түһүлгэҕэ дойду бары муннуктарыттан «ВОИН» ыччаты байыаннай-спортивнай бэлэмнээһин уонна патриотическай иитии киинин бастыҥ курсааннара мустуохтара диэн  СӨ Ыччакка дьыалаларыгар уонна социальнай коммуникацияларга министиэристибэтигэр иһитиннэрдилэр.

Сүүмэрдэммит хамаанда састаабыгар «Эдэр Дьоруойдар кэмнэрэ» бырагырааманан үөрэх бастакы түһүмэҕин ааспыт 12 кыттааччы киирдэ. Бу бырагыраама «ВОИН» киин инструктордарын салайыытынан байыаннай дьыала төрүттэрин баһылааһыны киллэрэр.

«Биһиги өрөспүүбүлүкэбит киэҥ далааһыннаах патриотическай бырайыакка көхтөөхтүк кыттарынан уонна федеральнай таһымнаах түһүлгэҕэ кыттар хамаанданы бастакынан бэлэмнииринэн киэн туттабыт. “Путь воина” күрэххэ кыттыы оҕолорго хорсун быһыы уонна хамаанданан үлэлиир тыын дьиҥнээх оскуолатынан буолуоҕар эрэнэбит», — диэн министиэристибэҕэ бэлиэтээтилэр.

Билиҥҥи туругунан хамаанда сүүмэрдиир күрэхтэһиилэргэ көхтөөхтүк бэлэмнэнэр. Бэлэмнэнии кэлэр түһүмэҕэ атырдьах ыйын 4-15 күннэригэр «Энергетик» оҕо лааҕырын баазатыгар былааннанар, онно күрэсчиттэр сүүмэрдиир түһүмэх сүрүн эрчиллиилэрин оҥорон көрүөхтэрэ. Онтон атырдьах ыйын 16-28 күннэригэр хамаанда бэлэмнэнии түмүктүүр түһүмэҕин ааһарга Волгоград уобалаһыгар көтүөҕэ. Ол курдук, килиимэккэ үөрэнэргэ уонна күрэхтэһии ыытыллар сирин кытта билсэргэ.

«Бүгүн ыччакка тус эппиэтинэс, сыалга дьулуур уонна Аҕа дойдуга сулууспалыырга бэлэм буолуу иитиллэр-үөскүүр усулуобуйатын тэрийэр ордук суолталаах. “ВОИН” киин бырагыраамата — бу туһунан буолар», — диэн биэдэмистибэҕэ бэлиэтээтилэр.

«Путь воина» күрэх бүтүн Арассыыйатааҕы сүүмэрдиир түһүмэҕэ Волгоград уобалаһыгар атырдьах ыйын 29 күнүттэн балаҕан ыйын 1 күнүгэр диэри ыытыллыаҕа. Онно уопсайа Арассыыйа араас эрэгийиэннэриттэн 21 хамаанда кыттыаҕа. Финал Дьокуускайга балаҕан ыйын 15-21 күннэригэр буолуоҕа. Регламент быһыытынан, күрэхтэһии курсааннар теоретическай уонна практическай билиилэрин тургутар тоҕус сорудахтан турар.

«ВОИН» киин 2022 сыллаахха Владимир Путин сорудаҕынан тэриллибитэ. Бүгүн  филиаллара 21 эрэгийиэҥҥэ, ол иһигэр Уһук Илиҥ биэс субъектыгар арылыннылар. Үлэ саҕаланыаҕыттан 77 980 курсаан уонна 8 тыһыынчаттан тахса байыаннай начаалынай бэлэмнэниини ааста.