Ийэҕэ сүгүрүйэн, махтанан

«Ыал — ийэтинэн» сэргэх тэрээһини «Мичээр» СК уонна Суотту модельнай бибилэтиэкэтэ тэрийдилэр, нэһилиэк ийэлэрин бибилэтиэкэҕэ түмтүлэр.

Бу туһунан биһиэхэ Суоттуттан бибилэтиэкэр Раиса Черкашина маннык иһитиннэрэр.

—Ийэлэргэ анаммыт тэрээһин аһыллыытын «Мичээр» СК уус-уран салайааччыта Борисова У.А. иилээн-саҕалаан ыытта. Филипп Габышев «Ийэҕэ» ырыаны истиҥник толоруута ытыс тыаһынан арыалланна.

 

«Суотту нэһилиэгин Герой ийэлэрэ» быыстапканы Хоноҕор бибилэтиэкэрэ Осипова И.А. билиһиннэрдэ. Мустубут дьон болҕомтотун Бороҕоннооҕу оҕо ускуустубатын оскуолатын Суоттутааҕы филиалын уһуйааччыта Портнягина Е.Я. тэрийбит «Биһиги ийэлэрбит» диэн оҕолор ийэлэрин уруһуйдаан оҥорбут мэтириэттэрин быыстапката болҕомтону тарта.

Тэрээһиммит бастакы түһүмэҕинэн «Алаһа дьиэ иэйиэхситэ-Ийэ барахсан» төгүрүк остуолу Суотту бибилэтиэкэтэ (Черкашина Р.Н.) ыытта. Манна үлэ, тыыл бэтэрээнэ, Дьоруой Ийэ Кривогорницына М.Н. улахан кыыһа Ил Ииһэ Хойондо Саһылыкаан Кыыһа оҕо сааһын, төрөппүттэрин туһунан кэпсээнин, СӨ үөрэҕириитин туйгуна, СӨ үөрэҕириитин систиэмэтин Бочуоттаах бэтэрээнэ, үлэ бэтэрээнэ Пак Т.В. Бочкаревтар дьиэ кэргэн төрүччүлэрин Гоголев И.В. — Бурҕас «Суотту: былыргы дьыллар мындааларыгар» кинигэтигэр олоҕуран оҥорбутун, СӨ үөрэҕириитин систиэмэтин Бочуоттаах бэтэрээнэ, успуорт бэтэрээнэ, норуот маастара Иванова Е.И.- Чыычаах Кыыһа чэбдигирдэр, туругу бөҕөргөтөр ньымаларын сырдаппытын төгүрүк остуол кыттыылаахтара сэргээн иһиттилэр, кэрэхсээтилэр.

 

Тэрээһин «Сатабыл» түһүмэҕэр: Саввинова Г.В., Заровняева М.П, Охлопкова М.П., Ордахова Л.С., Черкашина Я.И., Стрекаловская А.М., Портнягина Е.Я., Ил Ииһэ Хойондо Саһылыкаан Кыыһа ыыппыт маастар-кылаастарыгар араас сатабылларга үөрэттилэр. Ол курдук, оҕуруону тиһэр станокка үлэлииргэ, ситии өрөргө, сэлээппэ баайарга, кыбытык тигэргэ, доруоһата суох килиэп астыырга уо.д.а. үөрэннилэр, ыйытыыларыгар толору хоруйдары ыллылар.

Тэрээһиҥҥэ мустубут кыттыылаахтарбыт инникитин да маннык истиҥ, элбэҕи биллэрэр, иһитиннэрэр тэрээһиннэр тиһиктээхтик ыытыллалларыгар баҕалаахтарын биллэрдилэр.

Хаартыскаларга Раиса Черкашина түһэриитэ