2,5 миэтэрэ уһуннаах Луо оҥордулар

Өлүөхүмэ улууһун Токко нэһилиэгин олохтоохторо, педагог идэлээх, билигин бочуоттаах сынньалаҥҥа олорор педагогическай үлэ бэтэрээнэ Наталья Ильинична, успуорт бэтэрээнэ Сергей Семенович Сташковтар кыыстара Алена Сергеевнаны кытта үүнэр Луо сылын көрсө бүтүн 2,5 миэтэрэ кэриҥэ уһуннаах кыылы оҥорон таһаардылар.

“Аҕабыт уу кэлэр кэмигэр устан кэлбит мас силиһин: “Туохха эрэ майгынныыр эбээт”, – диэн дэриэбинэттэн отучча килэмиэтирдээх бултуур сириттэн мотуорунан состорон аҕалбыта. Уһуна быһа холуйан 2,5 миэтэрэ курдук. Баҕар, илиитигэр талааннаах уолум тугу эмэ уһаныа диэн бэлэмнээбитэ. Ол эрээри, итиччэ уһун маһы Дьокуускайга тиэйэн илдьэр уустук. Онон “сулус­таах чааһын” кэтэһэн икки сыл устата сытта.

Бу маспыт дракоҥҥа майгынныыр эбит ээ, кырааскалаан биэрдэххэ, үүт-үкчү буолууһу диэн бэлиэтии көрбүппүт.

Бу маспыт дракоҥҥа майгынныыр эбит ээ, кырааскалаан биэрдэххэ, үүт-үкчү буолууһу диэн бэлиэтии көрбүппүт. Аҕабыт төбөтүн эрбээн биэрдэ, ийэм биһикки маҥнай күөх өҥүнэн кырааскалаатыбыт, салгыы килэбэчигэс пенофолу, дискэлэри кыры­йан сыһыартаатыбыт. Ийэм хор­туонунан атах, харах, хаас эбэн өссө тупсаран биэрдэ”, – диэн Сташковтар улахан кыыстара, Токко оскуолатын остолобуойун сэбиэдиссэйэ Алена Сергеевна кэпсиир.

Икки сыл устата сыппыт мас быйылгы Педагог уонна уһу­йааччы, үүнэр Луо  сылын бэлиэтэ буолан Токко ытык ыалын тэлгэһэлэрин киэргэтэр, нэһилиэк олохтоохторун харахтарын үөрдэр оҥоһук буолан таҕыста.

Бэлиэ түгэҥҥэ сөп түбэһиннэрэн Сташковтар дьиэ кэргэн туһунан ахтан ааһар тоҕоос­тоох. Тиксиигэ күн сирин көрбүт, оҕо сааһа Дьокуускайга ааспыт, оччолорго биллиилээх 20-с нүөмэрдээх оскуоланы бүтэрбит Наталья Ильинична, Өлүөхүмэ Хоротуттан төрүттээх Сергей Семенович 1972 сыллаахха Дьокуускайдааҕы 1-кы нүөмэрдээх педагогическай училищеҕа муусука уонна физкултуура учуутала идэлэрин баһылаан, олохторун холбоон, Үөрэҕирии министиэристибэтин ыйыытынан, Өлүөхүмэ улууһун Токко оскуолатыгар учууталынан үлэлэрин саҕалыыллар.

Наталья Ильинична биир тэрилтэттэн харыс да халбарыйбакка, талан ылбыт идэтинэн 38 сыл устата муусука учууталынан таһаарыы­лаахтык үлэлээбитэ. Ырыа кэрэ эйгэтин таһынан, улууска көмүс тарбахтаах Далбар Хотун быһыытынан киэҥник биллэр. Иистэнньэҥ, уруһуйдьут, суохтан баары айан таһаарар сатабыллаах ийэ. “Хозяюшка” түмсүү иһинэн уонтан тахса сыл иистэнэр, “Саһарҕа” ырыа ансаамбылыгар ыллаабыта номнуо сүүрбэттэн тахса сыл буолла. “Быйыл ийэбит нэһилиэк иһинээҕи ыһыахха сахалыы таҥас (толору кэмпилиэк) куонкуруһугар бастакы миэстэни ылан, иистэнэр массыынанан бэлиэтэннэ”, – диэн Алена Сергеевна ийэтинэн киэн тутта кэпсиир.

Сергей Семенович сүүрбэччэ сыл физкултуура учууталынан, хайыһарга оҕо спортивнай оскуолатыгар ти­­риэньэрдээбитэ, биатлоҥҥа, ГТО-ҕа өрөспүүбүлүкэ чөмпүйүөнэ, успуорт бэтэрээнэ. Учууталлаан бүтэн баран кадровай булчутунан үлэлээбитэ, улуус үс төгүллээх чөмпүйүөн-булчута. Дьыл түөрт кэмин аһарбакка, күн бүгүнүгэр диэри бултуур-алтыыр, балыктыыр.

Ийэлэрин илиитигэр та­­лаана алта оҕоҕо барыларыгар бэриллибит. Кыргыттар кэрэни айар, иистэнэр, ыллыыр дьоҕурдаах эбит буоллахтарына, архитектор идэлээх, подполковник сололоох соҕотох уоллара Сергей Сергеевич хартыынаттан субу түһэн кэ­­лиэхтии уратытык уруһуйдуур, былыргы малы баабырыкаттан тахсыбыттыы саҥатыгар түһэрэр, маһынан, хаарынан араас оҥоһуктары айан-тутан таһаарар талааннаах.

Сташковтар биэс кыталык кыыс, биир хотой уол оҕоҕо күн сирин көрдөрөн, 17 сиэн, биэс хос сиэн минньигэс тапталын биллилэр. Былырыын кыһыл көмүс сыбаайбаларын бэлиэтээбиттэрэ.

Наталья Ильинична, Сергей Семенович ыал буолуохтарыттан бэлиэ күннэри, бырааһынньыктары баттаһа илиилэрин сылааһынан араас оҥоһуктары айан таһаараллар. Чуолаан Саҥа дьылга хаар оҥоһуктары чочуйаллар, айылҕа араас матыры­йаалыттан киэргэллэри, сувенирдары оҥороллор, хартыыналары уруһуйдууллар. “Ийэбит өрүү кэрэни кэрэхсии көрөр, кэрэҕэ талаһар. Аҕабыт ону ситэрэн биэрэр, күүс-көмө буолар”, – диэн Алена Сергеевна кэпсээнин түмүктүүр.

Хаартыскалар Сташковтар тус архыыптарыттан.