25 саастаах уол сымыйалаан кыбартыыра атыылаабыт

Нам улууһунааҕы ИДьМ холуобунай ирдэбилин үлэһиттэрэ эрдэ сууттана сылдьыбыт 25 саастаах киһи кыбартыыра атыылааһыныгар түөкүннээһиҥҥэ уорбаланарын быһаарбыттар. Бу туһунан ИДьМ пресс-сулууспата иһитиннэрэр.

Быһаарыллыбытынан, эр киһи олохтоох дьахтарга Оҕо дьиэтин иитиллээччитин быһыытынан бэриллибит кыбартыыратын атыылыырын туһунан эппит. Атыылаһааччы дьахтарга бу дьиэ биэс сылтан ордук кини бас билиитигэр баарын, бэйэтин бас билэр дьиэтин атыылыыр бырааптааҕын этэн, тылыгар киллэрбит. Ол эрээри оннук буолбатах эбит.

Дьахтартан 1,6 мөл.солк. ылан, сотору кэминэн атыыласпыт-атыылаабыт туһунан дуогабары оҥоруохпут диэбит уонна сибээстэн сүтэн хаалбыт.

Уорбаланааччыны Дьокуускайга оперативниктар туппуттар. Уорбут харчытын тус наадаларыгар бараабыт.

Түөкүннээһининэн холуобунай дьыала тэриллибит.