2,5 тыһ. тахса ыал оҕо уһуйаанын төлөбүрүгэр чэпчэтиинэн туһанна

 2517 ыал оҕо уһуйааннарыгар оҕону көрүүгэ-истиигэ төрөппүт төлөбүрүттэн босхолоннулар. Бу туһунан брифинг кэмигэр Саха Өрөспүүбүлүкэтин Үөрэҕин уонна билимин миниистирин бастакы солбуйааччы Ньургун Павлов иһитиннэрдэ.

Кини ону таһынан, аҕыс ыалга оҕолорун суукканы быһа үлэлиир бөлөхтөргө бастакынан киллэрэр быраап бэриллибитин бэлиэтээтэ. «62 ыал оҕолорун олорор сирдэринэн чугастааҕы оскуола иннинээҕи үөрэх тэрилтэтигэр көһөрөр кыаҕынан туһаннылар», — диэн Ньургун Павлов эттэ. Бу туһунан www.sakha.gov.ru суруйар.

Өйөбүл миэрэлэрэ оскуола үөрэнээччилэригэр эмиэ тарҕаналлар. СӨ Үөрэҕин уонна билимин министиэристибэтин дааннайынан, 5–11 кылаас 3 964 үөрэнээччитэ итии аһылыгынан хааччылынна.

«2 123 путевка оҕо сынньалаҥын, доруобуйатын чэбдигирдиитин уонна санаторнай-курортнай эмтэниитин тэрилтэлэригэр бэрилиннэ. 72 ыал оҕолорун олорор сирдэригэр чугас сытар оскуолаларга көһөрөр быраабынан туһаннылар», — диэн миниистири бастакы солбуйааччы кэпсээтэ. «2 964 оҕо эбии уопсай үөрэхтээһин бырагыраамаларынан — куруһуоктарга, секцияларга уонна атын хайысхаларга дьарыктарга босхо сылдьаллар», — диэн спикер иһитиннэрдэ.