2,5 тыһыынча киһи субуотунньукка кытынна

Дьокуускайга сааскы субуотунньуктар буола тураллар. Куораты ыраастыыр, тупсаҕай көрүҥнүүр туһуттан, элбэх киһи субуотунньукка кыттыста.

Дьокуускай куорат территорияны сайыннарар департаменын дааннайынан, муус устар 27 күнүгэр барыта 41 субуотунньук ыытыллыбыт. 212 тэрилтэттэн 2580 киһи лаппаахы, кыраабыл тутан, дьиэлэр тастарын, оҕо былаһааккаларын, искибиэрдэри, уулуссалары ыраастаатылар.

Онон барыта 2514 куул бөх хомулунна — кыһын устата мунньуллубут, ыһыллыбыт былаастык бытыылкалар, бакыаттар, мас-от, онтон да атын араас бөх-сах. Маны тэҥэ, 63 кубометр улахан кээмэйдээх бөҕү тиэйэн илтилэр. Анамматах сиргэ турар 23 реклама щиттарын көтүрдүлэр.

Онон уопсастыбаннай сирдэр, дьиэлэр тастара көстө ырааһырдылар, ыһылла сытар бөх-сах дьон хараҕын аалбат буолла.

Дьокуускай куорат дьаһалтата элбэх кыбартыыралаах дьиэлэр олохтоохторун, тэрилтэлэр үлэһиттэрин субуотунньукка тахсан, дьиэ тулатын ыраастыырга, күргүөмнээхтик үлэлииргэ ыҥырар. Оҕолору да кыттыһыннарыахха сөп. Киһи бэйэтэ хомуйар, ыраастыыр буоллаҕына, хаһан да ыспат-тохпот, атыттар да тардыналлар. Оҕолор көрө сылдьан, улахан дьонтон үөрэнэллэр.