27 киһи «Земскэй култуура үлэһитэ» бырагырааманан үлэлии барыахтара

Саха сиригэр «Земскэй култуура үлэһитэ» бырагыраама 2025 сылтан үлэлиир. Бу бырагыраама чэрчитинэн, өрөспүүбүлүкэ улуустарыгар 2026 сылга 27 исписэлиис барыахтаах.

Бу туһунан «Актуальное интервью» биэриигэ култуура уонна духуобунай сайдыы миниистирэ Афанасий Ноев иһитиннэрдэ.

«2025 сылга бастакынан 11 култуура үлэһитэ өрөспүүбүлүкэ 11 улууһугар, ол иһигэр Арктикаҕа баар нэһилиэктэргэ көһөн барбыттара. Быйыл 27 кубуота көрүллүбүтэ. Бырагыраамаҕа кыттааччылар 2 мөлүйүөн солкуобай суумалаах биир кэмнээх  төлөбүрү ылыахтара. Төлөбүрү ылар усулуобуйалартан биирдэстэринэн култуура үлэһитэ биэс сыллаах үлэтин иһин эбээһинэстээх буолар», — диэн миниистир бэлиэтээтэ.

«Земскэй култуура үлэһитэ» бырагыраамаҕа сайаапкалары тохсунньу 12 күнүттэн муус устар 15 күнүгэр диэри ылыахтара, талар хамыыһыйа муус устар 16 күнүттэн ыам ыйын 15 күнүгэр диэри сайабылыанньалары көрөр-истэр, сыаналыыр, ону тэҥэ кыайыылаахтарга иһитиннэрии ыытар.

Кыайыылаахтар испииһэктэрин бигэргэтэр сокуоннай аакта от ыйын 20 күнүгэр диэри тахсыаҕа, култуура тэрилтэлэрин кытта үлэ дуогабара атырдьах ыйын 10 күнүгэр диэри түһэрсиллиэхтээх, атырдьах ыйын 25 күнүгэр диэри биир кэмнээх төлөбүр туһунан дуогабардар түһэрсиллиэхтээхтэр.

2026 сылга өрөспүүбүлүкэҕэ Култуура сыла буолан, элбэх омуктаах норуот култуурунай баайдарын суолтатын уонна биир кэлим  сиэр-майгы сыаннастарын, уопсастыба сомоҕолоһуутун үөскэтиигэ ускуустуба оруолун Ил Дархан Анал этиитигэр тоһоҕолоон бэлиэтээтэ.

Билиҥҥи эйгэҕэ, көрүҥүнэн аныгы, тыынынан күүстээх, ис хоһоонунан сомоҕолуур айымньылары айан, ускуустуба дьон өйүгэр-санаатыгар, өйүгэр-санаатыгар сабыдыалын күүһүрдүү ордук суолталааҕын эттэ.

Санатан суруйдахха, «Земскэй култуура үлэһитэ» бырагыраама Владимир Путин ыйыытынан 2025 сыл тохсунньу 1 күнүттэн саҕаламмыта. Тыа сирин нэһилиэнньэлээх пууннарыгар, куорат тииптээх нэһилиэнньэлээх пууннарга уонна 50 тыһыынчаҕа диэри нэһилиэнньэлээх куораттарга үлэлии кэлэр эбэтэр көһөр култуура үлэһиттэрин өйүүргэ туһуланар. Исписэлиистэр кулууптарга, уопсастыбаннай кииннэргэ, бибилэтиэкэлэргэ, муусука уонна ускуустуба оскуолаларыгар үлэлииллэр.

Сиһилии: https://www.sakha.gov.ru/news/18717