27 саастаах халабырдьыт алта сылга көҥүлэ быһылынна

Дьокуускай куорат борокуратуурата Усуйаана улууһун 27 саастаах олохтооҕор сыһыаннаан көбүтүллүбүт холуобунай дьыалаҕа судаарыстыбаннай буруйдааһынын өйөөтө. Кини РФ ХК 162-с ыстатыйатын 2-с чааһынан (халааһын) буруйдааҕынан билинилиннэ.

Суукка быһаарыллыбытынан, 2023 сыл ыам ыйыгар сууттанааччы арыгы иһэн баран, Намныыр тракт учаастагын тыатыгар  билбэт дьонун уонна эмсэҕэлээччини кытта көрсүбүт. Эмсэҕэлээччи киһи баан каартатыгар харчылааҕын билэн, хара санаалаахтар  куомуннаһан илиилэринэн, атахтарынан уонна маһынан элбэхтэ охсуталаан, эр киһини сынньан төлөпүөнүн былдьаабыттар.

Онтон салгыы эр дьон кырбаммыт киһи счетуттан 29,3 тыһ. тахса солкуобайы уоран, эмсэҕэлээччини тыаҕа хаалларан баран, быһылаан буолбут сириттэн күрээбиттэр. Суут судаарыстыбаннай буруйдааччы этиитин учуоттаан, сууттанааччыны уопсай эрэсиимнээх көннөрөр холуонньаҕа 6 сылга көҥүлүн быһарга уураахтаата.

«Икки атын киһиэхэ сыһыаннаан холуобунай дьыалалар тохтотулуннулар», — диэн СӨ борокуратууратын пресс-сулууспата иһитиннэрдэ. Уураах сокуоннай күүһүгэр киирэ илик.