27 эбийиэк ыалдьыттары көрсөргө бэлэм

“Азия оҕолоро” оонньуулар кыттыылаахтарыгар бэлэмнэммит 27 эбийиэк бэрэбиэркэни барытын ааһан, дьону олордорго бэлэм буолла. Ол туһунан бэс ыйын 19 күнүгэр “Азия оҕолоро” оонньуулар кыттыылаахтарын олордорго Оробуочай хамыыһыйа эппиэттээх сэкирэтээрэ Любовь Афанасьева брифиҥҥэ эттэ.

“Бары ыйыллыбыт эбийиэктэр аккредитацияны, хамыыһыйа бэрэбиэркэтин  аастылар, дьону олордорго бэлэмнэр. Бары эбийиэктэр илии металлодетекторынан хааччылыннылар уонна чааһынай харабыллыыр тэрилтэлэри кытта дуогабардаахтар”, — диэн тоһоҕолоон бэлиэтээтэ Любовь Афанасьева.

“Азия оҕолоро” оонньуулар кыттыылаахтарын олордорго 27 эбийиэк көрүллүбүтэ, ол онтон сэттэтэ Хотугулуу-Илиҥҥи федеральнай университет эбийиэгэ, манна спортсменнары, спортивнай дэлэгээссийэлэри, судьуйалары олордуохтара.

Ол иһигэр бочуоттаах ыалдьыттары, СМИ бэрэстэбиитэллэрин, тас дойдулар дэлэгээссийэлэрин аҕыс отельга уонна гостиницаҕа түһэриэхтэрэ. Ону кытта СӨ Үөрэххэ, наукаҕа министиэристибэтин, СӨ Үлэҕэ уонна социальнай сайдыыга министиэристибэтин, СӨ Физическэй култуураҕа уонна успуорка министиэристибэтин истэринэн үлэлиир тэрилтэлэр 12 эбийиэктэрэ ыалдьыттарга көрсөргө бэлэмнэр.

“Бүгүҥҥү күн туругунан, СӨ Үөрэххэ, наукаҕа министиэристибэтин, СӨ Үлэҕэ уонна социальнай сайдыыга министиэристибэтин истэринэн үлэлиир тэрилтэлэр 7 эбийиэгэр култуурунай бырагыраама кыттыылаахтара – 1300 киһи киирдэ”, — диэн иһитиннэрдэ Любовь Афанасьева.

Кини этэринэн, ХИФУ бэйэтин эбийиэктэригэр 4800-тан тахса киһини олордор былааннаах, ол иһигэр спортсменнары, өҥө оҥорор этэрээттэн 500 киһини, 900-тэн тахса өрөспүүбүлкэттэн уонна атын эрэгийэнтэн сылдьар волонтердары диэн СӨ Ил Дарханын уонна СӨ Бырабыыталыстыбатын пресс-сулууспата иһитиннэрэр.