30 мөл.солк. уорбут түөкүн дьыалата суут көрүүтүгэр ыытылынна

Дьокуускай куорат борокуратуурата криптовалютаҕа инвестициялыыр аатыран дьон үбүн-харчытын уорууга сыһыаннаах холуобунай дьыаланы суукка ыытта. Бу туһунан СӨ Борокуратууратын пресс-сулууспата иһитиннэрэр.

Ол курдук, Дьокуускай куорат  борокуратуурата 31 саастаах олохтоох киһиэхэ сыһыаннаах холуобунай дьыаланан буруйдуур түмүгү бигэргэттэ. Кини РФ Холуобунай кодексатын 159-с ыстатыйатын 4-с чааһынан буруйданар.

Силиэстийэ барылынан, буруйданааччы 2023 сыл муус устартан бэс ыйыгар диэри криптовалютаҕа инвестициялыыр аатыран 9 граждантан уопсайа 30 мөл. солкуобайтан тахса суумалаах харчыларын уорбут.

Буруйдуур түмүк бигэргэммитин кэннэ холуобунай дьыаланы  борокуруор  Дьокуускайдааҕы куорат суутугар ыытта.