300-тэн тахса эдэр ыал 50 тыһыынча солкуобайы ыллылар

Саха сиригэр 2024 сылтан саҥа ыал буолар, 25 саастарын туола илик эдэр дьоҥҥо саахсаламмыттарын кэнниттэн 50 тыһыынча солкуобай төлөнөр буолбута.

Үлэ, социальнай сайдыы министиэристибэтэ иһитиннэрбитинэн, тохсунньуттан муус устар ортотугар диэри бу көмөнү 300-тэн тахса паара ылан туһанна.

Бу көмө миэрэтин үбүлээһинигэр өрөспүүбүлүкэ бүддьүөтүттэн 76,5 мөлүйүөн солкуобай көрүллүбүтэ. Саҥа ыал буолар эдэр дьоҥҥо сыбаайбалыылларыгар, атын да ороскуоттарыгар бу көмө буолар. Онон эдэрдэр саахсаламмакка эрэ холбоһон олороллоро аҕыйаан, кинилэри сокуонунан ыал буолалларыгар көҕүлүүр сыаллаах.

Сайабылыанньаны «Госуслуги» портал нөҥүө биэриэххэ сөп. Саахсаламмыт кэннэ 6 ый иһинэн бэриллиэхтээх. Эдэр дьон Саха сиригэр бастайааннай олорор буолуохтаахтар.