32 саастаах эр киһи Турцияҕа сынньана көтөөрү 1 мөл.солк. кэриҥэ иэһин төлөөтө

Суут бириистэптэрин оройуоннааҕы биир отделыгар Саха сирин олохтооҕо суол быһылаанын түмүгэр матырыйаалынай хоромньуну төлүүр иэһигэр дьыала көбүтүллүбүт. Бу туһунан Саха сиринээҕи Суут бириистэптэрин пресс-сулууспата иһитиннэрэр.

Иэстээҕинэн суол саахалыгар түбэспит «Мерседес» массыына 32 саастаах бас билээччитэ буолар. Суут быһаарыытынан хоромньуну толуйар эбээһинэс киниэхэ сүктэриллибит. Иэһин уопсай суумата 1 мөлүйүөн солкуобайы куоһарар эбит.

Эр киһи Турцияҕа сынньана бараары сылдьар буолан, Арассыыйа тас өттүгэр тахсарга бобор туһунан уурааҕы туппутун кэннэ икки-хас хонугунан иэһин сууматын толору төлөөбүт. Дьыала түмүктэммит.