32 саастаах киһи иэһин булумньу каартанан төлөөбүт

Алдан оройуоннааҕы ИДьМ силиэстийэлиир салаатын силиэдэбэтэлэ баан каартатыттан харчыны уоруунан холуобунай дьыала силиэстийэтин түмүктээтэ диэн СӨ ИДьМ пресс-сулууспата иһитиннэрэр.

Холуобунай ирдэбил үлэһиттэрэ суһал-ирдиир үлэлэри ыытан, маныаха олохтоох 32 саастаах киһи уорбаланарын быһаардылар.

Уорбаланааччы быһаарбытынан, кини маҕаһыыҥҥа баран иһэн баан каартатын булан ылбыт, онтон харчы уорарга санаммыт.

Маҕаһыынтан 900 солк. кэриҥэ суумаҕа бородуукта атыыласпытын төлөөбүт, итиэннэ эрдэ иэс ылбытын иһин эмиэ бу каартанан төлөөбүт. Каартанан төлүүргэ 1000 солк.-тан элбэҕи бараатахха пин-код көрдүүрүн билэр буолан, кассиртан чиэктэри 999 солк.-нан ааҕарыгар көрдөспүт. Оннук гынан кини 7 тыһ.солк. уорбут. Маҕаһыынтан дьиэлээбит. Ол күн киэһэтигэр полиция үлэһиттэрэ дьиэтигэр тиийбиттэр.

Уоруунан холуобунай дьыала тэрилиннэ.