Элбэх оҕолоох ыалларга «Дьиэ кэргэн ипотеката» эмиэ уларыйыан сөп

Дойду Бэрэсидьиэнэ Владимир Путин Бырабыыталыстыбаҕа «Дьиэ кэргэн ипотеката» бырагыраамаҕа уларытыылары киллэрэр кыаҕы көрөргө сорудахтаата. Бу уларытыылар чуолаан дьиэ кэргэҥҥэ оҕо ахсааныттан көрөн кирэдьиит муҥутуур сууматын дифференциациялыырга сыһыаннаахтар.

Бу сорудах ыам ыйын 29 күнүгэр буолан ааспыт Судаарыстыба демографияҕа уонна дьиэ кэргэн бэлиитикэтигэр сэбиэтин мунньаҕын түмүгүнэн дьүүллэһиллэн кэллэ. Ол курдук, премьер-миниистир Михаил Мишустин анал отчуоту 2027 сыл тохсунньу 1 күнүгэр диэри бэлэмнэниэхтээх.

Билигин туох уларыйыы киирбитэй?

Бу дьыл алтынньы 1 күнүттэн чэпчэтиилээх кирэдьиит бырыһыана уонна муҥутуур суумата оҕо ахсааныттан, ону тэҥэ эрэгийиэнтэн тутулуктаах буолбута.

Санаттахха, эрэгийиэннэр үксүлэригэр:

*   1 оҕолоох ыал – 6 мөл. солкуобайга диэри (10%-нан);

*   2 оҕолоох ыал – 8 мөл. солкуобайга диэри (8%-нан);

*   3, 4, 5 уонна онтон элбэх оҕолоох ыал – 10 мөл. солкуобайга диэри кирэдьиити ылар кыахтаахтар. 

Элбэх оҕолоохторго кирэдьиит бырыһыана тус-туспа: үс оҕолоохторго — 6%, түөрт оҕолоохторго — 4%, биэс уонна онтон элбэх оҕолоохторго — 2%. 

Ол эрээри, билигин үс, түөрт уонна биэс оҕолоох ыалларга кирэдьиит лимиитигэр биир хааччах турар – эрэгийиэннэргэ 10 мөл. солк., оттон Москваҕа, Санкт-Петербурга, Москва уонна Ленинград уобаластарыгар 18 мөл. солк. Бырыһыаннара эрэ уратылаһар.

Саҥа сорудах тугу уларытыай?

Саҥа сорудах сүрүн тосхоло – оҕо ахсаана төһөнөн элбэх да, кирэдьиит лимиитин суумата соччонон үрдүүрүн ситиһии. Элбэх оҕолоох ыалларга ити олус суолталаах боппуруос. Кинилэргэ киэҥ-куоҥ, улахан дьиэ наада буолара чуолкай, оттон оннук дьиэ сыаната билигин олохтоммут муҥутуур хааччахтан лаппа тахсар.

Алтынньы 1 күннээҕи уларытыылар сорудаҕы толоруунан ааҕыллаллар дуо?
Суох, тоҕо диэтэргин, кирэдьиит усулуобуйата оҕо ахсааныттан тутулуктаах буолла.  Бэрэсидьиэн сорудаҕа быһаччы кирэдьиит муҥутуур сууматын дифференциациялыыргы сыһыаннаах. Ол курдук,  үс уонна онтон элбэх оҕолоох ыалларга лимиит кэҥии илик.

Инньэ гынан, сорудах төһө толоруллубутун 2027 сыл тохсунньу 1 күнүгэр диэри бэриллиэхтээх Бырабыыталыстыба отчуотун кэнниттэн биирдэ сыаналыыр кыах үөскүөҕэ.