Эрэгийиэннэр икки ардыларынааҕы бастакы сэминээр-кэмпириэнсийэ

Соҕуруу Сахалиҥҥа «Традиционный ислам на Дальнем Востоке в духовно-нравственной модели национальной безопасности России» диэн эрэгийиэннэр икки ардыларынааҕы бастакы сэминээр-кэмпириэнсийэ буолбут.

Аан бастаан ыытыллыбыт тэрээһин пленарнай мунньаҕа «Арассыыйа — мин историям» историческай пааркаҕа ыытылынна диэн иһитиннэриигэ суруллар. Тэрээһини ыытары Уһук Илин мусульманнар Духуобунай управлениелара  көҕүлээбит. Кэмпириэнсийэ аһыллыытыгар муфтий Ахмад хазрат Гарифуллин тыл эппит. Кини Арассыыйа Баһылыга Владимир Путин Федеральнай мунньахха Этиитэ кыайыы туһугар уопсастыбаны сомоҕолуурга туһаайыллыбытын санаппыт. Судаарыстыба баһылыга Арассыыйа олохтоохторо үтүө санааларынан күүстээхтэрин хаста да тоһоҕолоон бэлиэтиибитин эппит.

«Бэрэсидьиэммит Федеральнай мунньахха биһиги дьыалабыт кырдьыктаах буоларын туһунан этиитинэн түмүктүүбүн», — диэбит кини. «Исламҥа маннык өйдөбүл баар, өскөтүн киһи ыала аччыгын билэр эрээри, бэйэтэ тот утуйар буоллаҕына, кини итэҕэлэ дьиҥнээх буолбатах. Биһиги дойдубутугар аттыларыгар туох буола турарыгар харахтарын саппатахтара үчүгэй. Кырдьык өрөгөйдүүр», — диэбит Ахмад хазрат Гарифуллин.

Кини модун Арассыыйа олохтоохторо бары тулуурдаах, дьүккүөрдээх, кыһамньылаах буолалларын көрдөрөллөрүгэр баҕарар. Кинилэр холбоһуктара, дойдубут бары олохтоохторо кырдьык өрөгөйдүүрүн туһугар бары кыһамньыларын ууралларын ыйбыт. «Биһиги бары тэрээһиммитинэн, үлэбитинэн, духуобунай үөрэтиибитинэн, өйдөтүүбүтүнэн өйүүбүт уонна өйүөхпүт», — диэбит кини.

Кэмпириэнсийэ кыттыылаахтара байыаннай эпэрээссийэҕэ олохторун толук уурбут саллааттар сырдык ааттарыгар сүгүрүйэн мүнүүтэ устата саҥата суох соҥуоран турбуттар.

Соҕуруу Сахалин епискобын аатыттан протоиерей Виктор Горбач тыл этэригэр, икки конфессия бэрэстэбиитэлэ Арассыыйаҕа бэриниилээхтэрин көрдөрөллөрүн, кинилэр бэйэ-бэйэлэрин кытары сибээһи туталларын, хардарыта өйөһөллөрүн ыйбыт. Түмсүү хаһааҥҥытааҕар да наадалааҕын бэлиэтээбит.

Сахалин уобалаһыгар норуоттар ассамблеяларын Сэбиэтин бэрэссэдээтэлэ Майя Кириллова байыаннай эпэрээссийэ саҕаланыаҕыттан тугу үлэлэспиттэрин сырдаппыт. «Биһиги байыастарбыт дьонноруттан-сэргэлэриттэн өйөбүллээхтэрин билиэхтээхтэр. Бастакы күнтэн гуманитарнай көмөнү хомуйбуппут. Нэдиэлэ анараа өртүгэр ыыппыт таһаҕаспытын туппуттарын туһунан биллэрдилэр», — диэбит.

Соҕуруу Сахалин дьаһалтатыттан вице-мэр Дмитрий Хайбриев биһиги дойдубут улахан уларыйыы кэмигэр турарын туһунан РФ Бэрэсидьиэнэ эппитин санаппыт. «Биһиги уопсастыбабытын тугунан да, хайдах да үрэйбэттэригэр, сатарыппаттарыгар чопчу эрэллээхпин. Биһиги  уустук быһыы-майгы үөскээтэҕинэ түмсэрбитин, сомоҕолоһорбутун өйдөөбөттөр. Уруккуттан түмсүүлээхпит», — диэбит кини.