35 саастаах дьахтар кэпсэтэбин диэн төлөпүөн уорбут

Дьокуускай куоракка полиция  төрдүс отделын дьуһуурунай чааһыгар  суотабай төлөпүөнүн уордарбыт дьахтартан сайабылыанньа киирбитин туһунан Ис дьыала министиэристибэтин пресс-сулууспата иһитиннэрдэ.

Суһал-ирдиир үлэ кэмигэр холуобунай ирдэбил үлэһиттэрэ,    35 саастаах Орто Халыматтан төрүттээх уорбаланааччыны туппуттар.

Ол курдук, уорбаланааччы Космонавтар уулуссаларыгар баар оптуобус сылаас тохтобулугар   эмсэҕэлээччиттэн төлөпүөннэһэбин диэн төлөпүөнүн уларсыбыт  итиэннэ таһырдьа тахсан хаалбыт. Аҕыйах мүнүүтэнэн эмсэҕэлээччи таһыгар тахсан  төлөпүөнүн  ыла сатаабыт. Онуоха уоруйах дьахтар төлөпүөнү туппутунан куотан хаалбыт. Уорбут малын комиссионнай маҕаһыыҥҥа туттарбыт. Ол  харчытынан арыгы атыыласпыт.

Билигин дьахтарга РФ Холуобунай кодексын 161 ыст. 1 чааһынан холуобунай дьыала көбүтүллүбүт.