3877 ыал баһаары сэрэтэр тэрили туруорда

Өрөспүүбүлүкэҕэ «Баһаары таһаарыма — АДПИ-ны туруор!» диэн социальнай аахсыйа ыытыллар. Ол чэчритинэн, 3877 ыалга 4160 баһаары сэрэтэр тэрил (АДПИ) туруорулунна диэн Судаарыстыбаннай баһаары утары сулууспа иһитиннэрэр.

Аахсыйаҕа сулууспа 1317 үлэһитэ кыттыбыт. Аахсыйа кыттыылаахтара тэрили бэйэлэрэ атыылаһаллар уонна дьиэлэригэр  туруораллар. Көмөлөһө таарыйа, атын дьон дьиэтигэр да туруоруохха сөп. Маннык тэрили анал маҕаныыннартан ылыахха сөп. Сыллата баһаартан 50 киһи суорума суолланар, дьиэ-уот, баай уокка былдьанан, мөлүйүөнүнэн ороскуот тахсар.

Онон баһаары сэрэтэр тэриллэр элбэх киһи олоҕун быыһаабыттара, көдьүүстээхтэрин көрдөрбүттэрэ. Дьиҥэ, сыаната да удамыр, онон бэйэҕэ эрэ буолбакка, билэр дьоҥҥутугар эмиэ туруоруҥ.