4 тыһ. тахса байыаннай дьайыы кыттыылааҕа уонна кинилэр дьиэ кэргэттэрэ реабилитационнай көмөнөн туһаннылар

Саха сиригэр байыаннай дьайыы 1488 кыттыылааҕа уонна кинилэр дьиэ кэргэттэрин 2738 чилиэнэ реабилитационнай көмөнү ыллылар. Бу туһунан СӨ  Бырабыыталыстыбатын бэрэссэдээтэлин солбуйааччы Георгий Степанов брифинг кэмигэр иһитиннэрдэ.

Георгий Степанов эппитинэн, эрэгийиэн араас хайысхалары хабар — материальнай өйөбүлтэн уонна мэдиссиинискэй реабилитацияттан саҕалаан, дьарыктаах буолууга көмөлөһүүгэ тиийэ, диэн sakha.gov.ru суруйар.

Бүгүҥҥү күҥҥэ Саха сиригэр 213 ыалга олорор дьиэлэрин гаастааһыҥҥа материальнай көмө оҥоһулунна, 746 байыаннай сулууспалаах төрөппүтэ санаторнай-курортнай эмтэниигэ көмөнү ыллылар, 554 киһи – байыаннай сулууспалаах эмтэнэр сиригэр барарыгар материальнай өйөбүлү ыллылар, 1488 байыас уонна кинилэр дьиэ кэргэттэрин 2738 чилиэнэ доруобуйа харыстабылын уонна социальнай хааччыйыы тэрилтэлэригэр реабилитацияны аастылар, 516 киһи дьиэтигэр уонна полустационарнай көрүҥүнэн социальнай өҥөнөн туһаннылар. Үлэҕэ киллэриигэ уонна идэҕэ үөрэтиигэ ураты болҕомто ууруллар. Нэһилиэнньэ дьарыктаах буолуутун кииннэригэр 1003 киһи, ол иһигэр 376 байыаннай дьайыы кыттыылааҕа уонна 627 кэргэттэрин чилиэннэрэ туруорсан кэлбиттэр. Кинилэртэн 190 киһи идэҕэ үөрэххэ ыытыллыбыт, оттон 627 киһи үлэҕэ киирбиттэр.

«Биһиги биир да көмүскээччибит уонна кини чугас дьоно өйөбүлэ суох хаалбаттарын туһугар хас биирдии ыалы кытта тус сыаллаах үлэни салгыыбыт. Бу үлэ салҕаныа уонна кэҥэтиллиэ», – диэн Георгий Степанов  бэлиэтээтэ.