400-тэн тахса байыаннай дьайыы кыттыылааҕа доруобуйатын чөлүгэр түһэрдэ

Ил Дархан «Доруобуйа харыстабылын сайыннарар уонна дьон доруобуйатын бөҕөргөтөр стратегическай хайысхалар тустарынан» ыйааҕар сөп түбэһиннэрэр, бүгүҥҥү күн туругунан 406  байыаннай дьайыы кыттыылааҕа доруобуйатын чөлүгэр түһэриини ааста.

Бу үлэ Мэдисиинэ чөлгө түһэрэр уонна спортивнай мэдисиинэ өрөспүүбүлүкэтээҕи киинигэр ыытыллар. Манна кинилэр төгүрүк суукка сытан эмтэнэллэр, маннык 5 куойка Аллараа Бэстээх бөһүөлэгин Абалаахтааҕы салаатыгар эмиэ баар. Байыастар өссө бу киин амбулаториятыгар уонна  Мэдкиин күнүскү стационарыгар реабилитацияны ааһыахтарын сөп.

Ол курдук кинилэргэ физиотерапевтическэй ньымалары: лазерынан, магнитынан эмтээһини, электрофореһы, УФ-терапияны, светотерапияны, ингаляцияны, электросону, экстракорпоральнай магнитнай стимуляцияны туттан эмтииллэр. Психологтар ыкса үлэлэһэллэр. Итинник чөлгө түһэрии кэлим үлэтин кэнниттэн байыастар күүрбүт өйдөрө-санаалара, эт-хаан өттүнэн туруктара быдан тупсарын исписэлиистэр бэлиэтииллэр, диэн иһитиннэрэр Ил Дархан, бырабыыталыстыба пресс-сулууспата.