452 байыас диспансеризацияны ааста

Билиҥҥи туругунан өрөспүүбүлүкэҕэ сэрэтэр дьаһаллары анал байыаннай дьайыы 452 бэтэрээнэ ааста. Бу туһунан от ыйын 28 күнүгэр буолбут брифиҥҥэ СӨ Доруобуйаҕа харыстабылын министиэристибэтин Нэһилиэнньэҕэ мэдиссиинискэй көмөнү тэрийии департаменын салайааччыта Дьулустаан Чичахов иһитиннэрдэ.

«Ааспыт сыл муус устар ыйыттан өрөспүүбүлүкэҕэ анал байыаннай дьайыы кыттыылаахтарыгар диспансеризация тэрилиннэ. Дьаһаллары нэдиэлэ аайы субуота күн бастакы сүһүөх бары мэдиссиинискэй тэрилтэлэрэ ыыталлар. Биир күн иһигэр буойуттар ирдэнэр бары чинчийиилэри идэлээх быраастарга ааһар кыахтаахтар», – диэн Дьулустаан Чичахов эттэ.

Кини иһитиннэрбитинэн, Саха сиригэр 3 722 анал байыаннай дьайыы кыттыылааҕар мэдиссиинискэй көмө оҥоһулунна, ол иһигэр 2 652 байыаннай сулууспалаахха – амбулаторнайдык, оттон 1070 – стационарга. Мэдиссиинискэй реабилитацияны 368 байыаннай дьайыылар бэтэрээннэрэ ааста. 735 буойуҥҥа психотерапевтическай уонна психиатрическай мэдиссиинискэй көмө оҥоһулунна. Муус устар 1 күнүттэн дойдуга Аҕа дойду буойуннарын дьиэ кэргэттэрин кэмитиэтин анал байыаннай дьайыы кыттыылаахтарын уонна кинилэр дьиэ кэргэттэрин медико-психологическай өйөөһүҥҥэ аналлаах «Психологы кытта кэпсэтии» диэн Биир кэлим федеральнай чаата суукканы быһа үлэлиир эрэсииминэн үлэтин саҕалаата. Чаатка уопуттаах, үрдүк квалификациялаах мэдиссиинискэй психологтар хамаандалара үлэлиир, кинилэр араас босхо медико-психологическай консультациялары оҥороллор. Чаатка кэпсэтии анонимнай, персональнай дааннайдар ирдэммэттэр. Чаатка дойду ханнык баҕарар эрэгийиэнин олохтооҕо суруйуон. Бу чаатка Дьокуускайдааҕы психоневрологическай диспансер биэс психолога үлэлиир. Билиҥҥи туругунан дойду араас эрэгийиэннэриттэн 392 киһиэхэ консультация ыытылынна.