48 киһи «ковидтан» үтүөрдэ

Сэтинньи 6 күнүнээҕи туругунан, өрөспүүбүлүкэҕэ 48 киһи коронавирустан үтүөрдэ.

“Роспотребнадзор” управлениета иһитиннэрбитинэн, ааспыт сууккаҕа балыыһаҕа 6 киһи киирбит, барыта 38 киһи ыалдьыбыта биллибит. Кинилэртэн 52,6%-ра – Дьокуускайга, 47,4%-ра – улуустарга ыалдьыбыттар. Бүгүҥҥү күҥҥэ балыыһаларга ыалдьыбыт дьон 25,6%-ра, дьиэлэригэр сытан 74,4%-ра эмтэнэллэр. Ааспыт сууккаҕа лабораториялар 161 анаалыһы оҥорбуттар. Пандемия саҕаланыаҕыттан барыта 2 629 956 анаалыс оҥоһуллубут.

Быһыыны биэрии салҕанар. Бүгүҥҥү күҥҥэ 692 719 киһи коронавируснай инфекцияны устары быһыыны ылбыт, ол улахан дьон 96,6%-ра буолар. Оттон “ковиднай” ыарыһахтарга 129 куойка анаммытыттан, 24%-на куранах турар.