50 сыл бииргэ олорбут Саҥыйахтаах олохтоохторун эҕэрдэлээтилэр

Өлүөхүмэ улууһугар Саха Өрөспүүбүлүкэтин ситэриилээх былааһын ааспыт сыллааҕы үлэтин отчуотун иитинэн Саҥыйахтаах нэһилиэгин ытыктанар олохтоохторо Тахватулиннары ыал буолбуттара 50 сылынан эҕэрдэлээтилэр.

Бырабыыталыстыба ситэриилээх былааһын отчуотун салайар үөрэх уонна билим миниистирэ Нюргуна Соколова, Ил Түмэн дьокутаата Алексей Колодезников, өрөспүүбүлүкэҕэ сааскы халаан содулун туоратар уонна чөлүгэр түһэриигэ үлэтин толорор дириэксийэтин салайааччыта Николай Соловьев, улуус баһылыга Николай Харбин  эҕэрдэлээтилэр.

Нюргуна Соколова ыал буолан 50 сыл бииргэ олорбуттарынан эҕэрдэлээн туран: “Биһиэхэ сүктэриллибит улахан, үөрүүлээх сорудаҕы  толоробут. Дьиэ кэргэн олоҕурбут сыаннаһын тута сылдьаргыт, өрөспүүбүлүкэҕэ, улууска киллэрбит кылааккыт иһин махтанабыт”, – диэн этэн туран, Галина Николаевна Леонид Ревготович Тахватулиннарга Ил Дархан Айсен Николаев илии баттааһыннаах “Дьиэ кэргэн килбиэнэ“ ураты бэлиэни үөрүүлээх быһыыга туттарда.

“Нэһилиэк эрэ буолбакка, улуус, өрөспүүбүлүкэ сайдыытыгар кылааккыт иһин махтанабыт. Бу билигин саамай суолталаах”, – диэн улуус баһылыга Николай Харбин бэлиэтээтэ.  Тахватулиннар кырыйдыбыт диэн олорботтор, оҕолорун атахтарыгар туруорбуттарын таһынан, күн бүгүн сиэннэригэр, хос сиэннэригэр сүбэ-ама буолан үөрдэллэр.