Хаартыска: sakhagov.ru
2025 сылга Саха сирэ 55 км тахса федеральнай суолу, 410 погоннай миэтэрэлээх искусственнай тутуулары нуормаҕа тиэрдиэхтэрэ. Үлэ А-331 «Бүлүү», Р-504 «Халыма» уонна А-360 «Лена» федеральнай суолларга ыытыллыаҕа. Бу туһунан өрөспүүбүлүкэ тырааныспарга уонна суол эбийиэктэригэр министиэристибэтэ иһитиннэрэр.
Суол үлэтин былаанынан, А-331 «Бүлүү» суолга 26 км кэриҥэ автомагистралы уонна 65 погоннай миэтэрэттэн тахса искусственнай тутуулары өрөмүөннүөхтэрэ. R-504 «Халыма» трассаҕа 19 км суол уонна 338 погоннай миэтэрэттэн тахса тутуулар нуормаҕа киириэхтэрэ. А-360 «Лена» федеральнай трассаҕа — 10-ча км суол уонна 6,9 погоннай миэтэрэлээх тутуулар.
Ил Дархан Айсен Николаев бу иннинэ суол үлэтин хаачыстыбатын хонтуруолун күүһүрдэргэ уонна федеральнай суоллары көрөр-истэр эппиэтинэстээх бэдэрээтчиттэргэ ирдэбили күүһүрдэргэ сорудахтаабыта. Федеральнай былаас уорганнарын кытта сылы эргиччи куттала суох айанныыры хааччыйар туһугар көхтөөх үлэ барар, ордук хоту улуустарга таһаҕаһы тиэрдиигэ сыһыаннаах маршруттарга.
Маны таһынан, өрөспүүбүлүкэҕэ Арассыыйа Бэрэсидьиэнэ Владимир Путин көҕүлээһининэн ыытыллыбыт «Олоххо инфраструктура» диэн улахан национальнай бырайыагы олоххо киллэрии салҕанар. Национальнай бырайыак чэрчитинэн, 2025 сылга 137,22 км усталаах суолу, ол иһигэр эрэгийиэннээҕи трассалары уонна куораттар уулуссаларын ситимин регламеҥҥа сөп түбэһиннэрии былааннанар.
Саамай улахан үлэ улуус суолларыгар былааннанар. 19 учаастакка үлэ барар, ол иһигэр Владимировка сэлиэнньэтиттэн Табаҕа сэлиэнньэтигэр эргииргэ диэри «Умнас» трассатын саҥардыы, «Амма» трассатын салгыы аспааллааһын, ону тэҥэ Улахан Харыйалаах, Улахан уонна Аччыгый Черепаниха, Дьороху уонна Бүлүү өрүстэри туоруур муосталары өрөмүөннээһин.
Дьокуускайга быйыл уулусса уонна суол ситимин 15,74 км нуормаҕа таһаарыы былааннанар. Үс учаастакка үлэ түмүктэннэ, биэһигэр тутуу-монтаж үлэтэ бара турар, быйыл сэтинньи бүтүүтэ түмүктэниэхтээх.
Ордук болҕомто өрөспүүбүлүкэ кыра куораттарыгар ууруллар. Үлэ 2025 сылга Алданы, Мииринэйи, Нерюнгрины уонна Ленскэйи хабыаҕа, онно 12,04 км уулусса уонна суол ситимин өрөмүөннүөхтэрэ. Оскуолаларга, оҕо саадтарыгар, балыыһаларга уонна култуура тэрилтэлэригэр киириини хааччыйар учаастактарга өрөмүөн ыытыллар.
Санатан эттэххэ, 2019-2024 сылларга Саха сиригэр «Куттала суох үрдүк хаачыстыбалаах суоллар» национальнай бырайыагынан 1400 км тахса суол өрөмүөннэммитэ. Бу үлэ 2025 сылтан «Олоххо инфраструктура» саҥа национальнай бырайыагынан салҕанар.
Ааспыт нэдиэлэ устата Дьокуускай куорат мээрийэтин административнай хамыыһыйата сымыйа кафеҕа, түүҥҥү кулуупка уонна итирдэр утахтары…
Соторутааҕыта тахсыбыт “Саха култууратын тиэрминнэрин нууччалыы-сахалыы, сахалыы-нууччалыы тылдьыта” дьоҥҥо-сэргэҕэ бэрт туһалаах буолсу. Аныгы курдук хас…
Чуапчы улууһун Соловьев нэһилиэгин баһылыгын боломуочуйатын болдьоҕун иннинэ тохтотор туһунан суут быһаарыыта күүһүгэр киирдэ. Чурапчы…
Офтальмология өрөспүүбүлүкэтээҕи балыыһатын мобильнай быраастара ыраах сытар нэһилиэнньэлээх пууннарга, ол иһигэр Арктика улуустарыгар, харахха эпэрээссийэлэри…
Бүгүн күнүс улуус киинин Амманы уонна Чакыр нэһилиэгин бэйэ-бэйэлэриттэн "арааран" турар Амма өрүс биир кытыллыттан…
Саха сиринээҕи Суут бириистэптэрин управлениетын Дьокуускай куораттааҕы салаата кирэдьиит төлөбүрүн төннөрөр туһунан дьыаланы түмүктээтэ. Дьокуускай…