Хаартыска: «СӨ ОДьКХ» ГУП Дьааҥытааҕы филиалын аварийнай-диспетчерскэй сулууспатыттан.
Ахсынньыга тымныйбатаҕын быйыл тохсунньуга иэстэһэн эрэр. Тохсунньу томороон тымныылара билиннилэр. Бу айылаах тымныыга Саха сирин хас биирдии олохтооҕун сылааһынан хааччыйар хомунаалынай хаһаайыстыба үлэһиттэрэ, этэргэ дылы, түүннэри-күнүстэри үлэлииллэр.
50 кыраадыс тымныы Саха сирин хомунаалынай хаһаайыстыбатын чахчы тургутуон тургутар, тустаах исписэлиистэр сөптөөхтүк, былааннаахтык үлэлииллэрин түмүгэр, бүтүн нэһилиэнньэлээх пууннары итиинэн хааччыйаллар.
“ОДьКХ” ГУП филиалын Дьааҥы улууһун Баатаҕай нэһилиэгинээҕи хочуолунайын хаһаайыстыбатын маастара Петр Слепцов СИА-ҕа билиҥҥи үлэ хаамыытын туһунан кэпсээтэ.
«Бу сылга хомунаалынай хаһаайыстыба салаатыгар үлэлээбитим 11-с сылыгар барар. Бастаан утаа хачыгаарынан саҕалаабытым, үс сылынан силиэсэр буолбутум. Билигин производственнай учаастакка – Баатаҕай бөһүөлэгин сылааһынан хааччыйар «Аэропорт» уонна «Киин» хочуолунайдарга маастарынан үлэлиибин. Сүрүннээн тустаах оборудованиелар кыһын тымныыга тохтоло суох үлэлииллэрин хааччыйабын, көрөбүн-истэбит уонна хочуолунай исписэлиистэрин үлэлэрин хонтуруоллуубун. Биһиги үлэбит олус эппиэтинэстээх. Хаһан баҕарар – күнүс, түүн ыҥыран ылыахтарын сөп. Ордук бу халлаан тымныытыгар олус эппиэтинэстээх”, – диэн Петр Слепцов кэпсээтэ.
Кини эппитинэн, быйыл Саҥа дьыл уһун өрөбүллэригэр түөрт суһал иһитиннэрии киирбит. Сүрүннээн көмөлтө буолар оборудованиелар алдьанан ылбыттар.
«Ардыгар тута сыбааркалыыр үлэлэр ирдэниллээччилэр. Биллэн турар, 55 кыраадыс тымныыга сыбаарканы иһэрдии манан аҕай дьыала буолбатах. Тута иттэр сыалтан аттыбытыгар тимир көлөнү туруорабыт. Сорох түгэннэргэ исписэлиистэр ууну кытта бодьуустаһаллар, хата, онно сөптөөх тустаах таҥас-сап баар. Кэлэктииппит олус үчүгэй, бэйэ-бэйэбитигэр тута көмөлөһөбүт, суһал, ыксаллаах түгэннэргэ үлэһиттэри барыларын ыҥырабыт. Мин Баатаҕайга төрөөбүтүм, онон төрөөбүт дойдубар үлэлиибин», – диир Баатаҕай бөһүөлэгин хомунаалынай хаһаайыстыбатын маастара.
Быйыл Баатаҕайга үгүс хочуолунайдарга хапытаалынай өрөмүөн ыытыллыа, ол курдук, хочуоллар уонна оборудованиелар уларытыллыахтара. Дьааҥы улууһун үрдүнэн билигин 25 хочуолунай үлэлиир. Кинилэр улуус үрдүнэн 14 оскуоланы, 15 оҕо саадын уонна 1495 олорор дьиэни итиинэн хааччыйаллар. Оттук сезонун кэмигэр 70 тыһыынчаттан тахса туонна таас чох туһаныллар.
Мария Горохова матырыйаалыттан
тылбаас (СИА).
От ыйа түмүктэнэр бүтэһик күннэрэ тураллар -- бэтинсэттэн атырдьах ыйыгар үктэнэбит. Атырдьах ыйын өбүгэ саҕаттан…
От ыйын 26-27 күннэригэр Кош-Агач оройуонун Горно-Алтайскай куоратыгар Куйактанар сиргэ СӨ норуотун маастара Иван Павлов…
Аллайыаха улууһугар уу кытыытыгар быраҕыллыбыт эргэ илимҥэ дьиэ хараҥаччыта хам ылларан, мүччү-хаччы мэҥэстэн сытар этэ.…
Саха сирин хамаандата дрон күрэҕэр Уһук Илин уокуру күрэхтэһиитигэр уонна чөмпүйэнээтигэр ситиһиилээхтик кыттан, 40 баар…
Суһал иһитиннэриинэн ИДьМ сулууспатын Ленскэй улууһун отделын холуобунай ирдэбилин үлэһиттэрэ 17 саастаах олохтооҕу «Toyota Land…
Кэмпэндээйигэ "Сир уустара" төгүрүк сыл үлэлиир киин оҕолору араас хайысханан сайыннарар. Бу сайын Саха сирин…