63 саастаах эр киһиэхэ сокуоннайа суох ботуруоннары харайбытынан холуобунай дьыала тэрилиннэ

Саха сиринээҕи Силиэстийэлиир кэмитиэтэ 63 саастаах эр киһиэхэ РФ Холуобунай Кодексатын 222-с ыстатыйатын 1 чааһынан (сокуоннайа суох ботуруоннары атыылаһыы, харайыы, таһыы, илдьэ сылдьыы) көрүллүбүт буруйу оҥоруу бэлиэлэринэн холуобунай дьыаланы тэрийдэ.

«Силиэстийэҕэ биллибитинэн, манна уорбаланааччы чуолкайдамматах сиртэн 7,62×54 мм калибрдаах 72 устуука трассирующай буулдьалаах, уоһа эрбэммит бинтиэпкэнэн ытар ботуруоннары атыыласпыт», — диэн биэдэмистибэ пресс-сулууспата иһитиннэрэр.

Ботуруоннары атыыласпытын кэннэ кини олору сокуону кэһэн туран, дьиэтигэр турар булчут саатын харайар сиэйпэҕэ харайбыт.

«Арассыыйа Федерациятын сокуонугар олоҕуран, дойдуга гражданскай уонна сулууспа сэбин быһыытынан трассирующай дьайыылаах буулдьалаах ботуруоннары эргинии бобуллаах», — диэн Силиэстийэлиир кэмитиэккэ чуолкайдаатылар.

Билиҥҥи кэмҥэ холуобунай дьыаланан силиэстийэлиир тэрээһиннэр ыытылла тураллар.