6459 киһи социальнай хантараагы ылла

Ахсынньы 18 күнүнээҕи туругунан, 6459 кыаммат ыал уонна соҕотох олорор дьон 814,8 мөлүйүөн солкуобай суумалаах социальнай хантараагы ыллылар. Ол иһигэр:

— үлэ көрдөнөргө — 370 киһи;

— бэйэ дьыалатын арынарга — 1184 киһи;

— кэтэх хаһаайыстыбаны кэҥэттэргэ — 352 киһи;

— ыарахан балаһыанньаттан тахсарга — 2398 киһи;

— оҕолоох дьиэ кэргэттэргэ анал бырагырааманан — 2072 ыал;

— үлэлиир саастаах инбэлииттэргэ үлэнэн реабилитация — 83 киһи.

Үлэ көрдөнөргө көмө кээмэйэ ортотунан 90,3 тыһыынча солкуобай, бэйэ дьыалатын арынарга — 362,8 тыһыынча солкуобай, кэтэх хаһаайыстыбаны сайыннарарга — 301,5 тыһыынча солкуобай, ыарахан балаһыанньаттан тахсарга — 64,6 тыһыынча солкуобай буолар.

Ил Дархан Айсен Николаев соторутааҕыта Анал этиитигэр бэйэ дьыалатын арынарга уонна кэтэх хаһаайыстыбаны сайыннарарга туһуламмыт  социальнай хантараак сууматын 500 тыһыынча солкуобайга диэри үрдэтэр туһунан эппитэ. Бу көмө дьадайыыны утары охсуһуу миэрэтинэн буолар.

Ил Дархан, бырабыыталыстыба дьаһалтатын пресс-сулууспата.