67 саастаах эр киһи арыгыттан күүскэ сүһүрэн балыыһаҕа киирбит

Соторутааҕыта 2-с №-дээх өрөспүүбүлүкэтээҕи балыыһаҕа 67 саастаах эр киһи арыгыттан күүскэ сүһүрэн киирбит. Ыарыһаҕы реанимацияҕа киллэрбиттэр. Маннык сүһүрүү биир сүрүн төрүөтүнэн суррогат, ол эбэтэр сымыйа арыгыны иһии буолар.

Экэнэмиичэскэй куттал суох буолуутун уонна хоруупсуйаны утары охсуһар управление үлэһиттэрэ хантан аҕылыллыбыта биллибэт, итэҕэтимтиэтэ суох арыгыны иһэр кутталлааҕын туһунан сэрэтэллэр. Бу ордук Саҥа дьыллааҕы бырааһынньыктар иннилэринэ сытыырхайар.

Арыгыны көҥүлэ суох эргинэр сирдэртэн уонна интэриниэт ситимин нөҥүө атыылаһымаҥ. Оннук бородууксуйа доруобай киһини инбэлиит оҥоруон, эбэтэр өссө куһаҕана — өлүүгэ тиэрдиэн сөп. Сүһүрүү төрүөтүнэн үксүгэр метил диэн кутталлаах дьаат буолар, онтон сүһүрбүт киһини реанимация усулуобуйатыгар эрэ быыһыахха сөп. Ол да буоллар, мүнүүтэнэн буолбакка, сөкүүндэнэн ааҕыллар быһаарыылаах кэм буолар. Киһи олоҕун быыһаабыт да түгэҥҥэ, метил хараҕы уонна атын уорганнары сатаан оһорбот гына алдьатар. Олоххутун уонна доруобуйаҕытын харыстааҥ!

Санаттахха, быйыл ахсынньы 1 күнүнээҕи туругунан, полиция үлэһиттэрэ арыгыны уонна испиирдээх бородууксуйаны сокуоннайа суох эргинии эйгэтигэр буруйу оҥоруу 42 чахчытын быһаарбыттар. Онтон 9 холуобунай дьыала силиэстийэлэнэн, суукка ыытыллыбыт. РФ Холуобунай кодексатын 171.1 уонна 171.3 ыстатыйаларынан тэриллибит холуобунай дьыалалары чинчийэр-суһал дьайыылар кэмигэр 18 мөлүйүөнтэн тахса солкуобайдаах 24 тыһыынчаттан тахса лиитэрэ сокуону кэһэн атыыланар арыгы бородууксуйата былдьаммыт.