70-тан тахса нэһилиэк Ил Дархан гранын ылла

Бу күннэргэ Ил Дархан Айсен Николаев  общественнай бэйэни салайыныыны өйөөһүҥҥэ гранын муниципальнай түһүмэҕин түмүгүн таһаардылар.

Быйыл Саха АССР 100 сылынан сибээстээн элбэх бырайыак, онно анаммыт итиэннэ төрөөбүт тылы сайыннарыыга, харыстааһыҥҥа, нэһилиэк, оройуон, өрөспүүбүлүкэ историятыгар туһуламмыт.
Бэйэни салайыныыны өйүүр граннар уопсай суумалара 19 мөл. солк. тахса. Бары бырайыактар дьон-сэргэ олоҕо тупсарыгар, куораттарга эрэ буолбакка, кыра даҕаны нэһилиэктэргэ социальнай-экэнэмиичэскэй сайдыы барарыгар анаммыттар. Эрдэ Өрөспүүбүлүкэ Баһылыга Айсен Николаев маннык граннары олохтоон баар кыһалҕалары туоратарга, быһаарарга олохтоохтору бэйэлэрин кытыннарар тиһиги оҥоруохтаахпыт диэн бэлиэтээн турар.
Граҥҥа кыттыбыт 112 нэһилиэктэн сүүмэрдээһин түмүгүнэн 72-тэ 19 мөл. солк. өйөбүлү ылла. Оҕону, ыччаты сайыннарыыга, ыччат көҕүлээһинин, туризмы, суһал байыаннай хомуурга барбыт дьоҥҥо уонна кинилэр дьиэ кэргэттэригэр көмөнү оҥоруу, култуурунай-маассабай, чэбдигирдэр, успуорт тэрээһиннэрин курдук, элбэх киһини хамсатар, үтүө дьыаланы түстүүр бырайыактар граҥҥа кыайбыттар.