700-чэкэ тыһ. кв.м. иэннээх олорор дьиэ үлэҕэ киирдэ

Былырыын 2024 сыллаахха рекорду олохтообут 752 тыһ. кв.м. олорор дьиэ тутуллубута, онон Ил Дархан былырыын Ил Түмэҥҥэ туһаайан этэригэр, 2025 сылга ити көрдөрүүттэн түспэт сорук турарын тоһоҕолоон ыйбыта.

2025 сыл бүтүөр диэри 48 тыһ. тахса киһи саахалланар туруктаах дьиэлэртэн көһөрүллүөхтээҕин, өссө 11 тыһ. киһи “Олоххо наадалаах инфраструктура” нацбырайыак чэрчитинэн саҥа дьиэнэн хааччыллыахтааҕын эппитэ.

2025 сыл ахсынньы ыйын туругунан Саха сиригэр 698 тыһ. кв.м. олорор дьиэ үлэҕэ киирдэ, бу мантан 449 тыһ. кв.миэтирэтин кэтэх дьиэ тутуута ылар.

“2019-2025 сс. дьону саахалланар туруктаах дьиэлэртэн көһөрүү” өрөспүүбүлүкэтээҕи бырагыраама үлэлии турар. Билиҥҥи туругунан 49,4 тыһ. киһи хайыы-үйэ көһөрүлүннэ. Балаҕан ыйын 1 күнүгэр диэри бырагырааманы олоххо киллэриигэ Территориялары сайыннарар пуонда эрэгийиэннээҕи бырайыактара көрбүт үбэ барыта туттулунна.

2025-2026 сылларга “Олоххо наадалаах инфраструктура” нацбырайыагынан 3,3 млрд солк. ыларга Саха сирин сайаапката ылылынна. Киирбит үбү уопсай иэнэ 31 тыһ. кв.м. тахса саахалланар туруктаах дьиэттэн 1,79 тыһ. киһини көһөрүүгэ ыытыахтара.

Ахсынньы 1 күнүн туругунан өрөспүүбүлүкэҕэ 17 КРТ (территорияны кэлимник сайыннарыы) бырайыага ылыллан турар. Билигин холбоон 1,2 мөл тыһ. кв.м. иэннээх тутуу барыахтаах саҥа сирдэрин бэлэмнээһин бара турар. Тутуллуохтаах эбийиэктэр наадалаах инженернэй уонна социальнай инфраструктуранан хааччыллыахтаахтар. Бу сыалга СӨ бырабыыталыстыбата бүддьүөт кирэдьиитин туһанар. Итинник иннинээҕи сылларга Нерюнгрига, Дьокуускайга, Жатайга 5,2 млрд солк. бүддьүөт кирэдьиитин туһаммыта. 2025 сылга федеральнай киини кытта бииргэ үлэлээһин түмүгүнэн “Инфраструктурнай меню” федеральнай бырайыак чэрчитинэн 5,3 млрд солк кирэдьиит ылылынна. Бу үп “Спортивнай” түөлбэни кэлимник сайыннарыыга ыытылынна. Бырайыак быһыытынан манна 327,67 тыһ. кв.м. иэннээх дьиэ тутуллуохтаах, 90 тыһ. кв.м. иэннээх 160 саахалланар туруктаах дьиэ көтүрүллүөхтээх.

Ил Дархан туһаайан этэригэр, тутуу сезона кылгаһынан дьиэлэри болдьоҕор үлэҕэ киллэрии бытаарарыгар тохтообута. Онон кыһыҥҥы кэми сөптөөхтүк туһанарга ДСК саҥа собуотугар панеллары оҥорууну күүһүрдэргэ соруйбута. Билигин “Звезднай” түөлбэҕэ саҥа собуот оҥорбут матырыйаалынан бастакы панельнай дьиэ тутулла турар. Сотору кэминэн өссө икки дьиэ тутуллуохтаах. Ону сэргэ саахалланар туруктаах дьиэлэртэн көһөрүллэр дьоҥҥо анаан үс монолитнай дьиэ тутулла турар.

РФ Бэрэсидьиэнэ Владимир Путин өйөбүлүнэн киирбит “Уһук Илиҥҥэ чэпчэки куортам дьиэтэ” бырагырааманан Саха сиригэр эдэр исписэлиистэри, элбэх оҕолоох ыаллары, наадалаах идэлээх дьоннору чэпчэки сыаналаах куортам дьиэнэн хааччыйыы күүскэ барар. Ахсынньы 1 күнүгэр Дьокуускайга 141 кыбартыыралаах иккис дьиэ тутуллан үлэҕэ киирдэ, сотору Алдаҥҥа биир дьиэ киириэхтээх. Куортам сыаната дьиэ иэниттэн көрөн, 5-тэн 15 тыһ. солк.диэри халбаҥныыр. Эһиил тыһыынчаттан тахса кыбартыыралаах маннык дьиэлэр Дьокуускайга, Нерюнгрига, Алдаҥҥа үлэҕэ киириэхтэрэ.