75 саастаах фермер хаһаайыстыбатыгар 100 сүөһү кыстаата

Сунтаар улууһун Күүкэй нэһилиэгин олохтооҕо Авдей Федоров оҕо сааһыттан фермаҕа үлэлээн, билигин да эдэрдии эрчимин ыһыктыбакка үлэни-хамнаһы былааннаан, сүөһүтүн  ахсаанын элбэтэргэ үлэлиир. 

Бөһүөлэктэн тэйиччи тэринэн олорор хаһаайыстыба урукку кэмнэргэ республикаҕа «Бастыҥ от бэлэмнээччи» күрэх кыайыылаахтара. 2016 сыллаахха тыа хаһаайыстыбатын гранынан 100 миэстэҕэ саҥа хотону тутан үлэҕэ киллэрбиттэрэ. Маассабай төрүөх саҕаланан күн бүгүн 5 ньирэй төрөөтө.

Халлаан сылыйан үлэ үгэнэ. Билигин маһы кэрдээччилэр тиит, бэс мастары тиэйэллэр. Сотору кэминэн пилораманы үлэлэтиэхтэрэ. Бу курдук, араас хайысханы ылсан Авдей Федоров нэһилиэккэ дьон дьиэ туттан олохсуйалларыгар көмө буолар.

Фермер маны таһынан сыспай сиэллээҕи эмиэ иитэр. Күн ахсын көстөөх сиргэ атынан сылдьан, 8 үөр сылгытын аһатар. Тыа хаһаайыстыбата уһун үйэлиир, тыа сирин бастыҥ дьарыга диир биһиги дьоруойбут.

@suntaar_ulus