Футболга маастар-кылаастар саҕаланнылар

Футболга маастар-кылаастар саҕаланнылар. Бу эрчиллиилэр, үөрэтиилэр  ЦСКА ПФК профессиональнай тириэньэрдэрин салалталарынан ыытыллаллар диэн иһитиннэрэллэр Дьокуускай куорат дьаһалтатын пресс-сулууспатыттан.

Бүгүн «1000 эдэр футболист» ВЭБ РФ далааһыннаах социальнай бырайыагын иитинэн, спортивнай маастар-кылаастар саҕаламмыттарын бэлиэтиир үөрүүлээх тэрээһинигэр Дьокуускай куорат баһылыга Евгений Григорьев кыттыыны ылла. Бу улахан маастар-кылааска Улан Удэттэн, Уссурийскайтан, Хабаровскайтан, Хаҥаластан, Мэҥэ Хаҥаластан, Дьокуускайтан футболунан умсугуйан дьарыктанар оҕолор хамаандалара муһуннулар.

«Дохсун» успуорт комплексыгар тэрээһиҥҥэ ЦСКА профессиональнай футболга кулуубун оҕо-ыччат успуорка оскуолатын дириэктэрэ Олег Корнаухов, СӨ физкултуураҕа уонна успуорка миниистирин солбуйааччы Александр Бугаев, уо.д.а. кыттыыны ыллылар.

Евгений Григорьев маннык үчүгэй уонна туһалаах тэрээһини көҕүлээччилэргэ уонна тэрийээччилэргэ, успуорт бу көрүҥэр оҕолор дьарыктаналларыгар, үөрэнэллэригэр кыаҕы биэрбиттэригэр махтанна.

«Оҕо успуордун бырааһынньыгар, эдэр спортсменнарга туох баар кыһамньыларын ууралларыгар, успуорка үчүгэй түмүктэри ситиһэллэригэр баҕарабын«, — диэтэ кини.

ЦСКА профессиональнай футбол кулуубун оҕолорго-ыччаттарга спортивнай оскуолатын дириэктэрэ Олег Корнаухов бу бырайыак футболу киэҥник тарҕатарга уонна чөл, чэгиэн олоххо сирдииргэ улахан оруоллааҕын бэлиэтээтэ. Маны сэргэ, спортивнай оскуола оҕолоругар уонна кинилэр тириэньэрдэригэр маннык маастар-кылаастар маастарыстыбаларын үрдэтэллэригэр көмөлөһөрүн ыйда.

Бэлиэтээн эттэххэ, 5-15 саастаах эдэр футболистар уонна кинилэр тириэньэрдэрэ үс күн устатыгар ЦСКА ПФК тириэньэрдэрин салалталарынан ыытыллар маастар-кылаастарга дьарыктаныахтара. Дьокуускайга тириэньэрдэр Сергей Дулык, Дмитрий Протопопов, Платон Пчелкин уонна Серджио Сперони кэлэн үөрэтэ сылдьаллар. Бу кэнниттэн бастыҥнары ЦСКА Академиятыгар ыҥырыахтарын сөп.

Тэрийээччилэр иһитиннэрбиттэринэн, Новокузнецкайга уонна Томскайга бырайыагынан 8  оҕо талыллыбыт, Екатеринбурга —  11, Владикавказка – 9. «1000 эдэр футболист» бырайыак түмүк тэрээһинэ 2024 сыл кулун тутар ыйга былааннанан турар.