80 оскуола үөрэнээччитэ «Юнармия» патриотическай хамсааһын кэккэтин хаҥаттылар

80 Нерюнгри оскуолатын үөрэнээччитэ Бүтүн Арассыыйатааҕы «Юнармия» патриотическай хамсааһын кэккэтин хаҥаттылар. Сэтинньи 19 күнүгэр Нерюнгри оройуонун дьаһалтатыгар үөрүүлээх быһыыга-майгыга анааһын сиэрэ-туома буолла.

Андаҕар биэрбиттэрин кэннэ оройуон баһылыга Роман Щегельняк  этэрээттэр бэрэстэбиитэллэригэр дастабырыанньаларын туттарда: «Орлята» оҕо уонна ыччат айар дьоҕурун сайыннарар киинэ,  «Беркут» байыаннай-патриотическай түмсүү — оҕо уонна ыччат айар дьоҕурун сайыннарар киин,  Серебряный Бор бөһүөлэгин этэрээтэ — «Гвардеецтэр» (1 №-дээх оскуола), «Патриоттар» (13 №-дээх оскуола), Саха сиринээҕи технологическай кэллиэс, — Чульман бөһ. 7 №-дээх оскуолата,  М.В. Водопьянов аатынан этэрээт — 24 №-дээх информационно-технологическай лиссиэй. Оҕолору анааһыннарынан эҕэрдэлээн туран, Роман Щегельняк «Юнармия» — көхтөөх гражданскай позиция үөскүүрүгэр, эппиэтинэстээх, бэйэни салайынар уонна көҕүлүүр буолуу сайдарыгар көмөлөһөр күүстээх патриотическай хамсааһын буоларын бэлиэтээтэ. Кини кыттыылаахтара биһиги дойдубут Бэрэсидьиэнэ уонна норуота туруорар сыалларын-соруктарын өйүүллэр, байыаннай дьыала алын сүһүөҕүн үөрэтэллэр, социальнай бырайыактары олоххо киллэрэллэр, хамаанданан үлэлииргэ үөрэнэллэр, Арассыыйа устуоруйатын үөрэтэллэр уонна уопсастыбаҕа суолталаах үлэҕэ-хамнаска наадалаах тус хаачыстыбаларын сайыннараллар. Бу туһунан Нерюнгри улууһун дьаһалтатын пресс-сулууспата иһитиннэрэр.

Оройуон баһылыга эдэр патриоттар биһиги улуу Ийэ дойдубут үтүө-мааны гражданнарынан үүнэн тахсыахтара диэн эрэлин биллэрдэ. Оҕолору ону таһынан Бүтүн Арассыыйатааҕы «Юнармия» байыаннай-патриотическай хамсааһын Нерюнгри оройуонун ыстаабын начаалынньыга Спартак Колесов уонна байыаннай дьайыы бэтэрээнэ Константин Помирчий эҕэрдэлээтилэр. Бойобуой дьайыылар бэтэрээннэрэ уонна байыаннай кыттыылаахтара саҥа юнармеецтарга «Биһиги кэммит дьоруойдара» диэн хорсун быһыы уруогун ыыттылар.